SHIIMBO SHA DAWIDI 7 - Bibilia Kui Mdedie fo Kimochi

Kiterewo kya mndu aisoko kilya kii kyake

(Kifuhiyo kya Dawidi kipfa kya kushi o kishari kya Benyamenyi)

¹ Mndumii, Ruwa oko, ngakudichia iyo, unjiashuo na walya wakeri injishiha, unjikiṟe.

² Alache injiraha mrima foko cha miiso, Kechifunjafunja kulawode monjichiṟa.

³ Mndumii-Ruwa oko, kokoya ndemewuta ishi, Kokoya njiwode wunyamaṟi mawokonyi hako.

⁴ Kokoya ndetaa kiṟaache Ulya alekaa-koko kipuo; (Ma nta! O njilemkiṟa O awei mtuuri oko ndawode kitewe).

⁵ Nahong'u mkituwa nanjioshe, Na iwada mrima foko, Ee da, nachume moo foko, Nawelaṟa kiṟumi kyako kilulinyi.

⁶ Mndumii kyekure na nyashi yapfo, Kyekuirie huye ya watwaṟi wako; Ukure kipfa kyako; Uleteṟya mwanduye.

⁷ Kisanzio kya mkambo ya wandu kikuṟingichie, Nodamie huye yawo iwaitoṟia

⁸ Mndumii nyi echidumbuo kya mkambo, Mndumii njianduya - wo inyi, Chando kinjisumhanye inyi, Kisumhanyie na wuhoṟotsu woko.

⁹ Wuwicho wo walai na wukiilohi wutsitse, Indi uhoṟotse menyi wukiilohi. Kipfa mohesha mrima ya wandu na shitsi Nyi Ruwa menyi wusumhanyi.

¹⁰ Ngawo yako nyi Ruwa, Mokiṟa wai na mrima msalari.

¹¹ Ruwa nyio modumbuo kya lohi Ee-da, Ruwa nyekenyashiko orio mkonu.

¹² Mndu alamewuye nyechipfuṟana oshu loke Nyi awode uda woke, na iwuteseheṟa.

¹³ Namteseheṟye shisha shake shewaaha, Mfi yake iwode modo.

¹⁴ Ambuya, ichu nawodo nyi mawawio ha wunyamaṟi, Nakapikie mawicho, kafee wongo.

¹⁵ Nyi alesuma rina, kasuma mnu wanda, Kaoloka rinenyi lilya alesuma amonyi.

¹⁶ Mawicho hake hechimuwuya huyake, Na shindo shake sha mbaka shechimwakya ododo.

¹⁷ Njechiana Ruwa chando kisumhanyi Njechiimbya rina lya Mndumii-chu ai huye.