SHIIMBO SHA DAWIDI 68 - Bibilia Kui Mdedie fo Kimochi

Kiimbo kya wuwinzi

(Ko Msongoru o waimbi: Kiimbo kya Dawidi)

¹ Ruwa kakure, wakituwa wake wakanyanyaṟika, na walya wamsuo wekedicha oshangu loke.

² Chando mtsu fokewiwito nyi otanu, nyi wudo okewawiwita; chando muo fokesalaa modonyi; na wudo wewuta mawicho wekedeka oshangunyi lo Ruwa.

³ Indi wenyi wusumhanyi wekechihiyo, na ifuda oshangunyi lo Ruwa, ee, wekekapa ngululu tsa sia.

⁴ Imbienyi Ruwa, ṟumishenyi rina lyake, mwachikienyi njia ichu ekedoya huye ya mapuchi. Moida kundu ko nuka cha moduo frasi; rina lyake nyi Mndumii-Ruwa; kapenyi ngululu tsa sia oshangunyi loke.

⁵ Ndeye o wangoeada na mtarami o wakusu, Ruwa kiidi kya kanyi koke kwele.

⁶ Ruwa nyekeinenga wahuṟi kanyi; kapfunguo wapfunge wakae wechiichuṟo mboṟa; indi wa orikiki wekaa oruka lo kiluli.

⁷ Hoi Ruwa, lilya ulesongoya wandu wapfo, lilya luweiida nuka ya msanga.

⁸ Oruka lulededema, ee, ngina ileletsa mvuo; oshangunyi lopfo Ruwa o Sinai; Ruwa o Israeli.

⁹ Hoi Ruwa, nyi ulenosa mvuo ya isaṟia; kyoṟa kilya kyapfo kiheri kilelehela kokiiinenga pfinya.

¹⁰ Oshari lopfo lukasamiapfo; hoi Ruwa, kui wucha wopfo kotarama waiwawonyie.

¹¹ Mndumii nyawuta idedo lyake; waka wekeonguo mbonyi ni ichekeṟo ling'anyi;

¹² Wamangi wa matorito waidicha, waidicha; na mndu mka ai kanyi nyi aihawa shiende shidenyi.

¹³ Kitewe kelaa mfiṟihenyi ili mbeta yechirunduka, nki? Makungo hake hawaa cha pesa; na mberi tsake cha Sahabu?

¹⁴ Ruwa menyi wuitoṟi kiheri alenanatsa wamangi ipfo, kuleoloka manzaho ha mvuo maili kulya Salmoni.

¹⁵ Nyi fumvu lya Ruwa fumvu Bashani, ni fumvu lileshi fumvu Bashanyi.

¹⁶ Nyo mafumvu maleshi, nkili mufuambuya na wunenyi; fumvu Ruwa alelanga ikaa huyalyo? Ee, Mndumii nyekaa huyalyo mlungana!

¹⁷ Magari ha Ruwa nyi shiku makumi hawi, shiku na shiku; Mndumii nyai kiidi kyako chando awei Sinai handu haele.

¹⁸ Iyo nyuledo ruwehu, kowada wuitoṟi, koinengo shiinengo kiidi kya wandu; Ee, ma walya walemi, Mndumii-Ruwa nakae nawo.

¹⁹ Kuichimbiṟo Mndumii, mkonu kui mkonu nyekeduo ṟio lyadu; Ruwa nyio okiṟo lodu.

²⁰ Ruwa kodu so nyi Ruwa mokiṟa; Na njia tsewuka opfunyi tsi na Mndumii-Ruwa.

²¹ Ee, Ruwa nechipaṟa mdo fo wakituwa wake, ododo lo mndu aengeṟa ideko luwode njui.

²² Mndumii nalededa, wuka Bashani njechimuwihiṟa; njechimuwihiṟa njimuuta oṟoonyi lo nduwa.

²³ Kapa kudende kopfo samunyi ya wakituwa wapfo, na olimi lo shite shapfo shiwone ohawi lokyo.

²⁴ Hoi Ruwa, wamewona ohendo lopfo, ohendo lo Ruwa oko, Mangi yako, ipfo kwele.

²⁵ Waimbi wasonguo, wekapa shinanda wakawaituma, kiidi kya wanawawaka wekapa shichengeṟe.

²⁶ Ichimbiṟenyi Ruwa kiidi kya kisanzio, Mndumii kiidi kya kisanzio kya Israeli.

²⁷ Kuwode Benyamenyi mtutu, mowachilia, wanene wa Yuda, chekeṟo lyawo; wanene wa Zebuloni; wanene wa Nafutali.

²⁸ Hoi Ruwa, wawasa pfinya tsapfo; hoi Ruwa, uwe mkari uleluwutia ṟiho.

²⁹ Kipfa kya hekalu lyapfo lya Yerusalemu; wamangi wechikuendie shihano.

³⁰ Dedia Misri, indo lilya lya ngeṟenyi na shirohoronyi; dedia wa mkambo, ipo lilya lya mapung'a na mahache halyo, mṟasa wakunyiiṟe na ikuendie shidaso sha fesa. Urahanyitse wandu walya wakundi shida!

³¹ Mabalozi wechicha wawuka Misri, Kushi yechileshia Ruwa mawoko hake faṟa.

³² Nyo wamangi wa wuyana, imbienyi Ruwa, ṟumishenyi Mndumii na shiimbo.

³³ Modo ruwehu, ruwehu tsa wokia kacha; Nalewuta ṟu lyake, ṟu lya pfinya.

³⁴ Italienyi Ruwa pfinya; wuitoṟi woke wui huye ya Israeli; na pfinya tsake tsii mapuchinyi.

³⁵ Ruwa nyi aoweshie; kuwokia handu hake haele. Nyio Ruwa o Israeli, nekeinenga wandu wake pfinya na wuidimi. Mndumii narumisho.