SHIIMBO SHA DAWIDI 60 - Bibilia Kui Mdedie fo Kimochi

Wuwinzi numa ya iwingo

(Ko Msongoru o waimbi: ofano lo Shushani Eduthi. Kiimbo kya Dawidi kelosha, kiheri awekapana na Waaramu kuwuka Naharaimu na Zoba, Yoabu kechiwuya nduma na iwaha Waedomu 12,000 kiidi kya Pichi lya Monyo)

¹ Hoi Ruwa nyulelukumba, kolurahanyitsa, kulewado nyashi, kyeluwihiṟe-se.

² Kulededemesha oruka kolupaṟa, usungusie alya handu kulewunduka, kipfa luidihina.

³ Nyi uleloṟa wandu wapfo malemeri, lutandawuka cha wandu wanyoye mvinyo.

⁴ Koinenga walya wakuowoye bendeṟa, kundu waiirie kipfa kya lohi.

⁵ Kundu wakunde wapfo wakiṟo, ukiṟe na owoko lopfo lulyo, noluidikie.

⁶ Ruwa nalededa na wele woke, “Na inyi njechikesa, njechihawa Shekemu; njehaluo pichi lya Sukoti shahu.

⁷ Giliadi nyi yako, na Manase nyi yako, na Efraemu nyi pfinya ya mdo foko. Yuda nyi ndichi yako ya wumangi.

⁸ Moabu nyi ipalu lyako lyesambia. Njechiwihitsya Edomu kyaadu kyako, na kifahiyo kya shida njikapie Mfilisti.”

⁹ Nyiu echinjiduo tane mṟinyi fuwode omombo? Nyiu echinjiduo mṟasa Edomu?

¹⁰ Hoi Ruwa, chi iyo ulelukumba? Hoi Ruwa uhendesane na wandu wadu wa shida?

¹¹ Uluendiye ngaya kipfa kya mtuuri, kipfa okiṟo lo mndu o wandu chi kindo-pfo.

¹² Kui ngaya ya Ruwa lochiwuta maṟiho, kipfa o nyechichuma-chuma watuuri wadu.