SHIIMBO SHA DAWIDI 57 - Bibilia Kui Mdedie fo Kimochi

Iterewa ngaya

(Ko Msongoru o waimbi: mbaṟe “Ulanyamaṟe!” Kiimbo kya Dawidi ameashuka Shauli na iowa opangenyi)

¹ Unjiichio wukiwa, hoi Ruwa, unjiichio wukiwa inyi, kipfa mrima foko fokudichia Iyo. Njechidicha maria ha makungo hapfo, mṟasa kiheriki kya fowa kiide.

² Njechilaha Ruwa ai huye, Ruwa ekeinutsia shindo shako.

³ Nyechinjikiṟa awuka Ruwehu, kechisesa ulya akundi injimeṟa. Ruwa nechidika osaṟio loke, na wulohi woke.

⁴ Moo foko fui kiidi kya miiso, njechisia moo kiidi kya walya wahya modo, Wandu maheho hawo nyi cha mapfumu na mfi, njolimi tsawo ni oshu lwohi.

⁵ Hoi Ruwa, uṟumisho kulya huyeya ruwehu, na huye ya oruka kose kuwade wuitoṟi wopfo.

⁶ Wawikie ndusu tsiinjioke maṟaushi tsinjiwade madende; Mrima foko fufusokie mfowa; wasumie rina oshangunyi loko; wakaolokapfo wawenyi!

⁷ Hoi Ruwa, mrima foko fufuwanzi; ngoo yako injiwanzi. Njechiimba, njechiimba shiimbo.

⁸ Kure kiṟumi kyako! Kurenyi, kinanda na kinanda kya ndusu, njechikure kilawo.

⁹ Hoi Mndumii njechikuana kiidi kya wandu, njechikuimbia shiimbo kiidi kya wandu wa masanga.

¹⁰ Kipfa asaṟio lopfo lung'anyi lukashika ruwehu, na wuhendeli wopfo mṟasa mapuchinyi.

¹¹ Hoi Ruwa, uṟumisho kulya huye ruwehu, na huye ya oruka kuwade wuitoṟi wopfo.