SHIIMBO SHA DAWIDI 52 - Bibilia Kui Mdedie fo Kimochi

Mwanduye fo Ruwa

(Ko msongoru o waimbi. Kiimbo kya Dawidi numa ya Doegi. Mwedomu, kehendia Sauli na imanyisha ke Dawidi nahendie kanyi ko Abimeleki)

¹ Kitewe kekuṟumisha na mawicho nyi iki, iyo mndu mkari? Wucha wo Ruwa wuiho mkonu yose.

² Olimi lopfo looka mtambo fo rumatsa, cha kyoshu keoda njui, kiohi, iyo menyi mtambo.

³ Nyi ukundi mawicho kota mecha, na ihamba wongo kota lohi.

⁴ Nyukundi madedo hose hedetsa wandu, iyo olimi lo mtambo.

⁵ Kya Indi Ruwa nyi echikunyamaṟa tane mlungana, nyechikukumba kuleshe, nyechikurakuo ipfo kanyi kopfo; nakukuṟuo orukenyi lo wai na moo.

⁶ Wenyi wuhoṟotsu wechiwona, wechiowuo na imseka.

⁷ Ate! Ichu nyi mndu ulya, alekeidikia ke Ruwa nyi pfinya tsake. Alekusiria mfoeṟa fo masaa hake, na ikuhaluo mkari kya mawicho hake.

⁸ Indi inyi njii cha msabibu, fudoe mmbenyi ya Ruwa; njikusiria osaṟio lo Ruwa mkonu yose.

⁹ Njechikuana mlungana kipfa nyi uwutie; njechiwedia rina lyapfo kipfa nyi lii licha; oshangunyi lo waidiki wa Ruwa opfo.