SHIIMBO SHA DAWIDI 51 - Bibilia Kui Mdedie fo Kimochi

Iterewa mhoṟie

(Ko msongoru o waimbi. Kiimbo kya Dawidi numa ya ikango nyi mwikimbi Nathani ko wunyamaṟi woke alewuta na Bathsheba)

¹ Hoi Ruwa unjiichio wukiwa, wuhiyanyi na osaṟio lopfo; chando isaṟia lyapfo ling'anyi, uangatse madeko hako hose.

² Unjisanje piu na sha wuwicho woko, unjiwute wunyamaṟi woko.

³ Kipfa inyi njiichi madeko hako, na wunyamaṟi woko wui oshangunyi loko kitsitsi.

⁴ Njilekudekio Iyo Ruwa kumonyi, na iwuta wunyamaṟi oshangunyi lopfo. Iyo umanyike nyi usumhanyi ili mandi odeda, Nyui mheṟemtsu ipfo mwanduyenyi yapfo.

⁵ Ambuya, njimuumbe, kiidi kya madeko; Wusu wo wama wulenjiduo nyi wo wunyamaṟi.

⁶ Ambuya nyokechihiṟo nyi wukiilohi wo mrimenyi. Iyo nyochinjikumbuṟa wuṟango kui kiṟika,

⁷ Unjisanje na maṟa hesamba na inyi njechiila, unjisanje na inyi njechiila, kota makuṟeṟa ha mtsudu.

⁸ Njiichuṟa sia na msiha, mafuo halya haweluo hachie.

⁹ Keowisha kyamu kyapfo kulaambuye wunyamaṟi woko, uangatse wukika woko wose.

¹⁰ Hoi Ruwa, njiinenga ngoo njili, unjiinenge ngoo njiha kiidi kyako.

¹¹ Ulanjiletsane na kyamu kyapfo, manya mumuyo opfo mwele ulanjisoke.

¹² Unjiwihiṟie sia ya okiṟo loko; unjiwanze na wuhoo na mrima.

¹³ Njechilosha wadeko njia tsapfo, na wanyamaṟi wechikuwuya.

¹⁴ Hoi Ruwa, Ruwa o okiṟo loko, njikiṟa na samu tsa wandu, na olimi loko lochiimba kiilohi kyapfo.

¹⁵ Hoi Mndumii, utambaṟuo dumbu lyako, na olimi loko lochihamba kiṟumi kyapfo.

¹⁶ Kipfa okechihiṟo nyi kidaso-pfo na mbechidasa, iyo okechihiṟo nyi kidaso kemaya modonyi-pfo.

¹⁷ Kidaso kya Ruwa nyi ngoo ikunyiiṟie; ngoo ikunyiiṟie na ifunjika, hoi Ruwa ochiiminapfo.

¹⁸ Uwutie Sioni mecha kui wucha wopfo, uwike wuhya njomombo tsa Yerusalemu.

¹⁹ Lyong'u ochichihiṟo nyi shidaso sha lohi, na shyaano shemaya madonyi njodambiko na idasa, naho wechiwuta mmbe, huya kitaṟa kyapfo kedasia.