SHIIMBO SHA DAWIDI 5 - Bibilia Kui Mdedie fo Kimochi

Kiterewo kiheri kya ngataṟa

(Ko Mosongoya weimba na mtoṟiṟo Shiimbo sha Dawidi)

¹ Hoi Mndumii adanyia-wo madedo hako, Uambuye na mahiyo hako.

² Uicho ṟu lya kifuhyo kyako, Hoi mangi yako na Ruwa oko, kipfa nyi iyo njekyekuterewa.

³ Mndumii, ngamenyi nyi ochiicho ṟu lyako, Ngamenyi njechiwika shiterewo shako oshangunyi lopfo na iwedia.

⁴ Iyo ni Ruwa okeichiko nyi mawichopfo, Mndu mbicho echikaa kopfo-pfo.

⁵ Wekyekushela wechihoṟokaoshangunyi lopfo-pfo, Nyi usuye wewuta sha mkika wose.

⁶ Nochinyamaṟa wededa wongo; Mndumii nyi nasuo mbahi na menyi mtambo.

⁷ Indi inyi kui isaṟia lyapfo ling'anyi, Njechiida na mba yapfo; Na ikuadapfuma kui mrima. Sumhana na hekalu lyapfo liele.

⁸ Mndumii, kenjisongoya kui wukiilohi wopfo, Kipfa kya iwo wanjialye. Utembecheṟe njia yapfo oshangunyi loko,

⁹ Kyamba madedo hawo hai mahendelipfo Mrima yawo ifananyi na mruma, njoṟoo tsawo nyi marina hai pang'a, Olimi lowo lokekulembetseṟa tupu.

¹⁰ Iyo, Ruwa, uwatae kiṟaache, Waoloke ipfo chilenyi yawo. Uwafune kipfa kya mfoeṟa fo madeko hawo, Kipfa wakuda iyo.

¹¹ Iwo wose wekekudichia wechichihiyo; Wechikapa ngululu tsa sia mlungana. Kya iyo nyi okewaringa walya wakundi rina lyapfo wechikesa kyapfo.

¹² Kipfa iyo nyi ochiwikya ona ulya awode usumhanyi; Mndumii, osaṟio lopfo lochifanana na ngawo ipfo koke.