SHIIMBO SHA DAWIDI 47 - Bibilia Kui Mdedie fo Kimochi

Ruwa nyi mangi ya wuyana wose

(Ko Msongoru o waimbi: Kiimbo kya Wakorahi)

¹ Nyo wandu wose, kapekapenyi mawoko, kapyenyi Ruwa onu ngululu na ṟu lya sia.

² Kipfa Mndumii Ai huye, nyi aoweshie, Nyio mangi ang'anyi kota wose wai wuyanenyi.

³ Nyi echitoromisha wandu wa wuyana wose, wandu wa mkambo nyiechiwawika shi ya madende hadu.

⁴ Nyi echilusambuṟia kyoṟa kyadu, wulole wo Yakobo ichu alemkunda.

⁵ Ruwa nado ruwehu kui ngululu tsa sia, Mndumii kui ṟu lya iranda.

⁶ Imbienyi Ruwa, ee, imbenyi; imbienyi mangi yadu, ee, imbenyi.

⁷ Kipfa Ruwa nyio mangi o wuyana wose, imbenyi kui wuṟango.

⁸ Ruwa naitoṟia wandu wa mkambo, Ruwa nadamie loṟikehu loke luele.

⁹ Wanene wa mkambo wakusanza handu hamu, wawe wandu wa Ruwa o Abrahamu. Kipfa ngawo tsa wuyana tsii na Ruwa, namng'anyishe mnu.