SHIIMBO SHA DAWIDI 44 - Bibilia Kui Mdedie fo Kimochi

Kiterewo kyeterewa wuringi wo Ruwa

(Ko msongoru o waimbi: Kiimbo kya Wakorahi)

¹ Hoi Ruwa, luleicho na madu hadu, wandeadu waleluwia, mawuto ulewuta kiheri kyawo, lilya mbooko:

² Kui owoko lopfo nyi ulewingia wandu wa mkambo, Kowawika-pfo handu hawo. Iyo kulelyisa wandu-wo wukiwa, kopfumbutsa waku wadu.

³ Kyamba chi kui oshu lowo lulewainenga oruka pfo, Ma chi pfinya ya owoko lowo lulewakiṟa pfo, Indi nyi owoko lopfo lo kulyo, ee-da, owoko lopfo, Na ngeela ya kyamu kyapfo, kipfa nyi uwewakundi.

⁴ Hoi Ruwa iyo nyi mangi yako! Kyewawasia mbonyi tsa okiṟo ko Yakobo.

⁵ Kui pfinya tsapfo lochiolotsa watuuri wadu, kui rina lyapfo lochichumachuma iwo wekyelukaṟuo, iwo weluwonyia.

⁶ Kipfa njechikusiria wuda wokopfo, ma oshu loko lochinjikiṟa inyi pfo.

⁷ Indi nyi Iyo ulelukiṟa na watuuri wadu; Walya walusuo kowahutsia sonu.

⁸ Luleṟumishia Ruwa mfiri puti Na rina lyapfo lochiliana mlungana.

⁹ Kyaindi nyi ulelukumba, nyi ulelusutsa; ma uhendesanyi naso shidenyi pfo.

¹⁰ Noluwihiṟa na numa lukakumba mtuuri odu mhongo, walya walusuo, wakakuwonya masinga.

¹¹ Nyi uleluwuta cha machondi luwe kando, kolurahanyitsa kiidi kya wandu wa mkambo.

¹² Kokumba wandu wapfo wulya kulawode masaa. Ma ulewona ho kiira kui wuhuru wowo pfo.

¹³ Nyi oluhaluo kindo kededodedo ko wamṟasa wadu, kitaluo na wuilo ko walya walutengetie.

¹⁴ Nyi uleluhaluo oṟaayo ko wandu wa mkambo, kipfa kya isingitsa mdo ya wandu wa oruka.

¹⁵ Mfiri puti ngasuka oshangunyi lo wandu, na Sonu tsako tsanjishikiya.

¹⁶ Kui ṟu lya mndu motaluo na iruma, kipfa kya mkituwa na motaa kiṟache.

¹⁷ Ishi shose shilelukoya, indi lulekuhadima pfo, manya mkundana fopfo lulefuda pfo.

¹⁸ Luleda mrima yadu iwuye na numa pfo Manya madende hadu haleda njia yapfo-pfo.

¹⁹ Kolupaṟapaṟa kiidi kya shisii; na ilushikiya maṟishenyi ha opfu.

²⁰ Kokoya lulehadima rina lya Ruwa odu; ang'u ileshia mawoko hadu ruwa lihenu,

²¹ Ngesa Ruwa echiambuya idedo-lyo? Kipfa nyio aichi shiṟikenyi sha mrima.

²² Ote, kipfa kyapfo luwaho mfiri puti, Lutano cha machondi hadao kishinjyonyi.

²³ Kekure, Mndumii, nkili olaa? Kure, ulalukumbe piu.

²⁴ Nkili oluṟika oshangu lopfo, Kohadima iwonyio lyadu na iwutio sha mbaka?

²⁵ Kyamba mrima yadu yahongoma kilulinyi, Ndeu tsadu tsawadana na teri.

²⁶ Kure nowe ndarama yadu, noluashuo kipfa kya isaṟia lyapfo.