SHIIMBO SHA DAWIDI 41 - Bibilia Kui Mdedie fo Kimochi

Kiterewo kya mndu aluo

(Ko Msongoru o waimbi: Kiimbo kya Dawidi)

¹ Nanga ulya mokumbuo mfafa; Mndumii nyiechimwashuo kiheri kya kiwi.

² Mndumii nyiechimringa nakae na moo, Nao nyiechiwemba wuyanenyi. Manya ulamde kiidi kya wakituwa wake.

³ Mndumii nyiechimṟihika ili aluo alee kitaṟenyi. Kiidi kya ndaṟe yake komtarama.

⁴ Inyi njilehamba, Mndumii, unjisaṟie Uchiṟe ngoo yako kipfa ngakunyamaṟia.

⁵ Wakituwa wako wanjisenda na madedo mawicho; “Nyi indi echipfa, rina lyake lideke?”

⁶ Na umu owo kacha injiambuya kadeda wongo, Mrima foke fukosanyia mawicho, Nao ili aida na ipfo nja kahahamba.

⁷ Iwo wose wanjisuo wanjideda, wakusaṟa shako shiwicho.

⁸ Idedo lyawo lya singirinyi liwicho-wicho, ke echiidima ikure-se oo kitaṟenyi pfo.

⁹ Mbuya yako ya mrima iya mbemkusirie, sa lulelya nao kitela kimu, aichu anjiiria kishishindo kyake.

¹⁰ Kyaindi Iyo Mndumii, unjiringe, Unjiire njiidime iwa taa.

¹¹ Kya idedo lyi ngamanya ke nyi umchihiye kyako. Kipfa mkituwa oko ededa nanjiwinge pfo.

¹² Na Inyi kiidi kya wuhendeli woko nonjiṟihikie, nonjiwikie oshangunyi lopfo mlungana.

¹³ Wulalu naṟumisho Mndumii, Ruwa o Israeli, wokia kacha na kacha. Amenyi na Amenyi.