SHIIMBO SHA DAWIDI 40 - Bibilia Kui Mdedie fo Kimochi

Kiimbo kyeṟumisha

(Ko msongoru o waimbi: Kiimbo kya Dawidi)

¹ Njileweda Mndumii kui itirisia, kanjiaramia kaicho kifuhiyo kyako.

² Kanjiwuta ṟungunyi lya odetso, kuwuka terinyi handu hawerendia; kanjihoṟotsa handu ha iṟaṟa, kawanza madende hako.

³ Kawika kiimbo kihya dumbunyi lyako, nkyo kiṟumi kya Ruwa odu. Wafoi wechiwona waowuo, nawo wechiidikia Mndumii.

⁴ Nanga ulya ahaluye Mndumii kikusirio kyake, manya aambuye wandu wa orikiki-pfo, ma iwo wahalukie wongo.

⁵ Hoi Mndumii, Ruwa oko, nyi ulewuta ngata tsifoi mnu, ngata tsapfo na makusaṟo hapfo kodu, kuwode mofananyitso na iyo-pfo; kokoya mbekunda ihamba na ionguo, nyi tsifoi mnu tsilechiwa itala.

⁶ Ulechihiṟo nyi shidaso na mwano pfo, nyi uleṟuhusuo madu hako, Shidaso shemaya modonyi na sha wunyamaṟi uleshikunda pfo.

⁷ Nlyong'u njilehamba, Ambuya ngacha (Kiidi kya njonyi injiṟehie njileṟehio).

⁸ Iwuta shilya ukundi, Hoi Ruwa oko, iyo sia yako; Ee mawawaso hapfo hai mrimenyi foko.

⁹ Njileonguo mbonyi tsa wulohi kiidi kya kisanzio king'anyi Njileda ma kimu njilahamba-pfo, hoi Mndumii noichi.

¹⁰ Njileṟika wulohi wopfo mrimenyi foko-pfo; njilehamba wuhendeli wopfo na okiṟo lopfo, njileṟika osaṟio na wulohi wopfo-pfo, niidi kya kisanzyo king'anyi.

¹¹ Na iyo, Mndumii, ulanjiime mboṟa tsapfo, Osaṟio lopfo na wulohi wopfo, shinjiringe mkonu yose. (Kiimbo kya Dawidi 70)

Kiterewo keterewa ngaya

(Kiimbo kya Dawidi 70)

¹² Kipfa mawicho helechiwa iitala; hanjitengetie inyi. Mawicho hako hanjikoya, ma njechiidima iwona-pfo. Hafoi kota njui tsa mdo foko, na mrima foko fonjida.

¹³ Hoi Mndumii, kyekunjikiṟie Hoi Mndumii, njitarama owinyi.

¹⁴ Wasonu, wasuke wose, Iwo wakeṟi injiwalia mrima foko wafurumatse. Wawihiṟo numa, watisiki, Walya wawachihiṟe nyi mwaanduye foko.

¹⁵ Wakuinadie, sonu tsiwe tsawo Iwo wakeri injiwia, O Iyo! O Iyo!

¹⁶ Wachihiyo, wakeseke kipfa kyapfo. Woose wakeri ikushiha. Iwo Wakundi okiṟo lopfo, Wahambe kitsitsi, Mndumii naṟumisho.

¹⁷ Inyi nyi mkiwa njihuṟi, Mndumii nyi echinjiringa. Nyi iyo ui kitarama na mkiṟa oko. Hoi Ruwa oko ulakeleo.