SHIIMBO SHA DAWIDI 4 - Bibilia Kui Mdedie fo Kimochi

Iterewa kitarama kyukanyi

(Ko Mosongoya weimba: Shihiya sha ndusu - Shinanda sheimba, Shiimbo sha Dawidi)

¹ Hoi Ruwa o wukilohi woko, unjiidikye wo matika njikeri ilaha; Unjitarame kiheri kya kiwi kyako; unjisaṟie na iicho kiterewo kyako.

² Lanye wandu mṟasa indi kiṟumi kyako kyechisuka? Ngesa nyi mochikunda sha maai na ishiha wongo?

³ Indi manyenyi ke Mndumii amekusambuṟya mcha oke; Mndumii nyi echiicho ili njechimlaha.

⁴ Owuonyi manya mlanyamaṟe, Kusaṟenyi ipfo shitaṟenyi shanu na itirisia.

⁵ Wikyenyi mwano fusumhanyi, Na ikusirya Mndumii.

⁶ Wafoi wekehamba, nyiu echiluloṟa mecha? Mndumii, uluirie ngeela ya kyamu kyapfo.

⁷ Nyi uwikye sia mrimenyi foko, kota iwo waichuṟye shilimu na mvinyo.

⁸ Njechirengera na ilaa mado na kipuo, Kipfa nyi iyo, Mndumii, kumonyi, Okenjisaṟia na injiwikya ona.