SHIIMBO SHA DAWIDI 34 - Bibilia Kui Mdedie fo Kimochi

Kiṟumi ko Wucha wo Ruwa

(Kiimbo kya Dawidi kiheri alekutana oṟuṟe oshangunyi lo Abimeleki)

¹ Njechikuṟumisha orio kiheri iyo Mndumii, kiṟumi kyapfo kii dumbunyi lyako mlungana.

² Kiidi kya Mndumii mrima foko fochikuṟumisha, wakunyiiṟie waicho wachihiyo.

³ Ichikenyi Mndumii hamu na inyi, Luadapfume rina lake hamu lose.

⁴ Njilelaha Mndumii kanjihaluo, Kanjikiṟa wuowu woko wose.

⁵ Wakamwindutsia meso wakawona ngeela, manya shamu shawo shechisonupfo.

⁶ Mkiwa-chu nalelaha, Mndumii kaicho, kamkiṟa mawina hake hose.

⁷ Malaika o mndumii nekewika kiacho, kechitengetia wamkundi na iwakiṟa.

⁸ Sahenyi muwone chando Mndumii ai mcha. Nanga mndu ulya akusirie koke.

⁹ Indiyenyi Mndumii, nyo waele wake kye, walya wamwindiye wawuṟie kindo pfo.

¹⁰ Malea ha miiso hekeuṟa, hekewado nyi njaa, walya washiha Mndumii wekeuṟa kindo kyose kii kicha pfo.

¹¹ Kenchonyi, lanye wana, munjiadanyie; njimloshe chando kiwaṟi iindiya Mndumii.

¹² Nyiwu ulya amchihiṟe nyi moo, akundi moo mleshe na iwona shicha?

¹³ Ima olimi lopfo na mawicho, na dumbu lyapfo lilaoke mtambo.

¹⁴ Da mawicho na uwute mecha, shiha ofoṟo nolulatie.

¹⁵ Meso ha Mndumii hekeambuya wenyi wusumhanyi, na madu hake hekeicho kilio kyawo.

¹⁶ Kyamu kya Mndumii kii ko wewuta mawicho, nawute ngumbuo yawo wuyanenyi.

¹⁷ Wahendeli walefihiṟa, Mndumii kawaicho, kawakiṟa na mawukiwa hawo hose.

¹⁸ Mndumii nyi ai hafui na walya wafunjikie mrima; walya wekunyiiṟa mrimenyi kawakiṟa.

¹⁹ Matuuro ha wenyi wusumhanyi hafoi, indi Mndumii nyiechimchiṟa naho hose.

²⁰ Nyiekeringa mafuo hawo hose, lilefunjika ho ma limupfo.

²¹ Wunyamaṟi wochiwaha alai msumhanyi Na walya wasuo mhendeli wechianduyo.

²² Mndumii nyieketalaa mrima ya waṟundi wake, Manya Wechianduyo wose wemdichia-pfo.