SHIIMBO SHA DAWIDI 32 - Bibilia Kui Mdedie fo Kimochi

Iwuto lya wunyamaṟi

(Kiimbo kya Dawidi. Opfundo)

¹ Nanga ulya amhoṟie wunyamaṟi; Na madekohake nalahaambuye se.

² Nanga ulya Mndumii alechimwitalia madeko, Mrimenyi koke kulawode mtambo.

³ Mandi njiletsia mafuo hako haleangalala. Kipfa kya mawawio mfiri puti.

⁴ Kipfa mfiri na kio; owoko lopfo lulenjiwiia lulemeri. Mbiṟuko foko fukaumia ngawa Cha teri njiumu kiheri kya kwari.

⁵ Njilekuwia wunyamaṟi woko, Ma njileṟika deko lyakopfo. Njilehamba njechitocha wunyamaṟi woko ko Mndumii. Na iyo konjihoṟia wunyamari woko wose.

⁶ Ko ikyo orio mndu mcha oose, nakuterewe kiheri ochiwoneka. Nkya lohi kiheri mfu fo mṟinga foida, Fochimkooya pfo.

⁷ Nyi iyo ui monjiṟihika, na inringa na matuuro, Nyiochinjiṟingichia shiimbo sha okiṟo.

⁸ “Njechikulosha na ikuloṟa njia ochiidia; Njekupfunda, riso lyako lyechikuambuya.

⁹ Mlawe cha frasi ang'u itiko, Mando ha ngeṟenyi halawode wuṟango. Kui ngada na ngowa tsa dumbu Isho shaidima ihatirimisha, halechikusembelia.” Ochiidima ihaitoṟia wulyapfo.

¹⁰ Mndu mbicho nawode ngapo sa tsifoi, Indi ichu mohendelia Mndumii osario loke lochimtengetia.

¹¹ Chihiyonyi kipfa kya Mndumii Kesenyi, nyo wenyi wusumhanyi; Kapenyi ngululu tsa sia; Nyo mose mui wahoṟotsu wo mrima.