SHIIMBO SHA DAWIDI 31 - Bibilia Kui Mdedie fo Kimochi

Kiterewo kiidi kya ngataṟa tsing'anyi

(Ko msongoru o waimbi: Kiimbo kya Dawidi)

¹ Ngakudichia iyo, Mndumii, Njilaho sonu mlungana. Kui wusumhanyi wopfo unjichiṟe.

² Udehe kudu kopfo, unjikiṟe owinyi. Uwe pfinya yako na iho lya iṟaṟa, mba iwode mfiṟiha yenjikiṟa.

³ Nyi iyo ui kishari kyako na oṟiho loko; Kipfa kya rina lyapfo unjiteteṟe, unjiringe.

⁴ Nyiochinjiwuta mshihodinyi fulya walewika kiṟika Kipfa Iyo nyi oṟiho loko.

⁵ Ngawika mumuyo foko mawokonyi hapfo; Nyi ulenjikiṟa hoi Mndumii, Ruwa oko o lohi.

⁶ Njisuo iwo wekehamba sha wongo shilawaṟi. Indi inyi njikusiria Mndumii.

⁷ Njiṟumisha, na ichihiṟo nyi osaṟio lopfo, Kipfa omewona shituuro shako. Omemanya wukiwa wo mrima foko,

⁸ Manya ulenjiwika mawokonyi ha wakituwa pfo. Madende hako kulehahoṟotsa handu hecha.

⁹ Hoi Mndumii, unjisaṟie, kipfa njii wukiwenyi, Riso lyako linari kipfa kya wukiwa, Ee, mbihu foko na mrima foko da.

¹⁰ Kipfa ohendo loko lofoma kipfa kya fowa, Na maka yako kipfa kya iluo; pfinya tsako tsidedema kipfa kya mawicho hako, na mafuo hako hahaduka.

¹¹ Kipfa kya watuuri wako ngadehelyo, Ee, ngoseṟa ko wamṟasa wako; Na kindo kiṟihishye ko mbuya tsako; Woose walenjiwona njienyi walenjidicha.

¹² Njimhadime cha mnying'a fulakekumbuyo; Ngawa cha kihia kifunjikie.

¹³ Kyamba ngameicho mnu shidedo shifoi sha wongo; Fowa tsii njora tsose. Ili walehaluyana kyako, Waleoka mtambo fowuta moo foko.

¹⁴ Kyaindi inyi na kopfo Iyo njikusirie Mndumii; Ngahamba, “Iyo nyio Ruwa oko!”

¹⁵ Mkonu yako nyi ipfo mawokonyi hapfo ii; Unjikiṟe na wakituwa wako, na walya wainjiṟinjawia.

¹⁶ Uwaṟie mṟundi opfo ngeela ya kyamu kyapfo. Unjikiṟe kui kipfa kya osaṟio lopfo.

¹⁷ Hoi Mndumii, njilasonu, kipfa ngakulaha; Wahutsio sonu walai wecha, watsie kulya ko wapfu.

¹⁸ Madumbu ha wongo hakae pipi. Halya hededia o wusumhanyi madedo ha orikiki; Ko ikudosa na ikushela.

¹⁹ Chando osaṟio lopfo lung'anyi, Uwikie walya wakuowoye! Uwutie walya wekudichia. Oshangunyi lo wandu!

²⁰ Nyiochiwaringa na wuṟiingi wo wandu Imanyisha ke noipfo; Nyiochiwaṟika mbenyi yapfo Na irekiana kui njolimi.

²¹ Mndumii naṟumisho, kipfa nyialenjiwutia Osaṟio lo kiṟiha mṟinyi fulya fuwode oṟiho.

²² Na inyi njilededa wo pfuka-pfuka, Njiledeo kuleshe na meso hapfo. Indi nyi uleicho ṟu lya shiterewo shako Kiheri njilekulilia.

²³ Kundenyi Mndumiii, Nyo mose muowoye Ruwa. Mndumii nyiekeringa walya wahendeli. Nyieketaa menyi orikiki kilya kimbaṟi.

²⁴ Kukarishenyi, kuwanzenyi mrimenyi; Nyo mose muiwedia Mndumii.