SHIIMBO SHA DAWIDI 30 - Bibilia Kui Mdedie fo Kimochi

Kiterewo kyeana

(Kiimbo kyetana hekalu liwe liele; Kiimbo kya Dawidi)

¹ Hoi Mndumii njechikuṟumisha kipfa omenjiira, Manya ulechihiṟa wakituwa wako kyako-pfo.

² Hoi Mndumii, Ruwa oko, Ngakufuhiya, njilekufuhia konjichiṟa.

³ Omeira mrima foko, Hoi Mndumii Kuwuka terinyi ko wai shi. Konjiwihiṟiya moo konjiwuta Kiidi kya waisoṟowia rinenyi.

⁴ Imbienyi Mndumii shiimbo, nyo mui wakunde wake. Na iwika mwano. Kipfa kya ngumbuo yake na wuele woke.

⁵ Kipfa tuke yake nyi ya oweṟe sa lwangu, Madedo hake hai na moo. Kofia kilio kekecha ili kio, Indi ngamenyi kukawada sia.

⁶ Lilya njilewona njilehamba, “Njechiwingio mlungana-pfo!”

⁷ Mndumii, kui madedo hapfo Iyo nyi kulewanza fumvu lyako Nyi uleṟika kyamu kyapfo, Ngaawo mmoo.

⁸ Hoi Mndumii nyi Iyo njikufihiṟiya, Ee Mndumii na iyo njilekuterewa.

⁹ “Kiira kiki kii samunyi yako Ili njechisokya rinenyi? Kiluli kekuṟumisha? Nakechihamba lohi yapfo?

¹⁰ Hoi Mndumii, kyeichowo, unjisaṟie; Mndumii, uwe mtarami oko!”

¹¹ Mkonu fo iawuka lyako kolihaluo lyatemo; Konjiwuta masaṟa, konjiṟika sia.

¹² Kundu wuitoṟi woko wukuṟumishe, Manya ulatsie. Hoi Mndumii, Ruwa oko, Njechikuana mlungana.