SHIIMBO SHA DAWIDI 26 - Bibilia Kui Mdedie fo Kimochi

Kiterewo kya Mndu mhendelyi

(Ko msongoru o waimbi: Kiimbo kya Dawidi)

¹ Hoi Mndumii, njianduya inyi, Kipfa ngahenda njii na wuhoṟotsu woko, Na inyi njikusiria Mndumii tupu.

² Hoi Mndumii unjiheshe na injiambuya, Usanje mrima foko na ngoo yako.

³ Kipfa isaṟia lyapfo lii oshangunyi loko, Inyi njihenda kiidi kya kilohi kyapfo.

⁴ Njiledamya hamu na wandu wa mkika pfo, Manya njechiida ko wandu wekulembetseṟa pfo.

⁵ Njisuye kisanzio kya wewuta mawicho, Ma njechidamia hamu na wanyamaṟi-pfo.

⁶ Njechisanja mawoko hako ndawade mti, Na itengeta rasio lyapfo, iyo Hoi Mndumii.

⁷ Ṟu lyako lilungane ikuana, na ihamba maṟunda hapfo ha ṟiho.

⁸ Mndumii, njimchihie nyi hando ha mbenyi yapfo,

⁹ Handu ha rasionyi lya kiṟumi kyapfo, Ma moo foko hamu na wandu wepusuo samu.

¹⁰ Mawoko hawo hafanyi mawicho Owoko lowo lo kulyo luichiwie itsutsuma.

¹¹ Kyaindi inyi njechichumia njii na wuhoṟotsu; Unjikiṟe unjiwutie mecha.

¹² Kudende koko kuhoṟoki handu hecha; Njechiṟumisha Mndumii handu ha kisanzio.