SHIIMBO SHA DAWIDI 22 - Bibilia Kui Mdedie fo Kimochi

Kilio

(Ko msongoru o waimbi: kui ofano lo kiimbo kya irambako)

¹ Ruwa oko, Ruwa oko, Nkili onjida? Nkili ui haleshe na Okiṟo loko na madedo ha isumukia lyako?

² Hoi Ruwa oko, ngafihiṟa mfiri onjihalu opfo, Na kiheri kya kio indi ngawona sia pfo.

³ Iyo ui Mwele, Udamye huye ya kiṟumi kya Israeli.

⁴ Wandiadu walekusiria na Iyo, Walekusiria, na Iyo kowakiṟa.

⁵ Wakakufihiṟya lyo kowakiṟa, Welekusiria walasonu.

⁶ Kake, inyi nyi kisiri ma chi mndu pfo, Iisalucha lya wandu na itengeluka lyawo.

⁷ Woose wanjiwona wanseka mnu nakamu,, Wekyenjisunya wesingitsa mdo yawo;

⁸ Wahamba, Ukusirie Ruwa, nakuchiṟe; Namkiṟe wulalu, kipfa nyamchihiye kyake.

⁹ Ee-da, Iyo nyi ulenjiwuta wusunyi, Nyi ulenjiidikisha maweenyi ha wama oko.

¹⁰ Njilekumbo kopfo wokia wusunyi, Wookya wusunyi wo wama oko, iyo nyi Ruwa oko.

¹¹ Ma kulakae haleshe na inyi kipfa wukiwa wui hafui, Kipfa kuwode mtarami pfo.

¹² Mapung'a hafoi hanjiṟingichye Tsilya nlang'a tsa Bashanyi tsanjichiinga.

¹³ Wanjialia madumbu hawo, Cha miiso fuikurakura na ipoṟohoṟa.

¹⁴ Ngapusuka cha mṟinga, mafuo hako hose haṟehukie, Mrima foko fowa cha muo, na isalaa kunu kiidi kyako.

¹⁵ Pfinya tsako tsauma cha kyoho, Olimi loko luwadanyi na mahundu hako; Nyi unjiwikye kilulinyi kya opfu.

¹⁶ Kipfa shite shinjiṟingichye; Kisanzyo kya wambafu kyanjichiinga, Wanjipfunga mawoko na madende.

¹⁷ Njechiidima itala mafuo hako hose; wo wanjiambuya na injituluya meso.

¹⁸ Wahawa nguo tsako, Na ṟao lyako wakalikapya kuṟukuhya.

¹⁹ Iyo, Mndumii, ulakae haleshe, Hoi pfinya tsako, kambiṟa injitarama.

²⁰ Nonjiletse mrima foko na oshu,, Na pfinya tsa kite mkunde oko.

²¹ Dumbunyi lya miiso unjikiṟe; Ee na membenyi tsa mboho konjihaluo.

Kiimbo keana

²² Njechionguo rina lyapfo ko wanawawama wako, Makidi hawi ha kisanzyo njechikuṟumisha.

²³ Nyo mokeadapfuma Mndumii mṟumishenyi, Nyo moose mui wana wa Yakobo, mng'anyishenyi, Indiyenyi nyo moose mui oshari lo Israeli.

²⁴ Kipfa alepiṟa wukiwa wo moliso wukiwapfo, Manya alesukyo kyawo pfo; Ma alewoshya kyamu kyake pfo, Kiheri alemfihiṟya nalemwicho.

²⁵ Kopfo nyi kuwukiepfo kiṟumi kyako, Kiidi kya kisanzyo king'anyi Njechiawutsia shiasa shako, Oshangunyi lo iwo wekyemwindia.

²⁶ Wahoo wechilya na iihuda, Weosha Mndumii wechimṟumisha Mrima yanu ikae na moo mlungana.

²⁷ Mtsitsionyi yose ya wuyana yechimkumbuo, Wandu wechiwuya mawokonyi ha Mndumii. Wandu wa mbaṟi tsose tsa wandu wechimiindya.

²⁸ Kipfa wumangi nyi wo Ruwa, Nyio aitoṟye wandu wa wuyana-wu.

²⁹ Wandu wa orikiki wose wa wuyana wechilya na ihamba matumatu, Wepfira-ndi wose na iarama kilulinyi; Ee, ma ulya alaidima iletsa moo foke.

³⁰ Oshari loke lochimṟundia, Mbonyi tsa Ruwa tsechiongoyo Ko kishari kikeri icha.

³¹ Iwo wechifeo numa wechiongoyo mbonyi tsake, Ke nyio aleṟunda ishi shose.