SHIIMBO SHA DAWIDI 20 - Bibilia Kui Mdedie fo Kimochi

Iterewa wuwinzi

(Ko msongoru o waimbi: Kiimbo kya Dawidi)

¹ Mndumii nakuhaluo kiheri kya kiwi, Rina lya Ruwa o Yakobo likuirie.

² Nakudikie mtarami awukie welenyi woke, Nakuwanze awuka Sioni.

³ Nakumbuo mwano yapfo yose, Naambie shidaso shapfo.

⁴ Nakuinenge kihianyi na kilya mrima fopfo fulangie, Na iinutsya makusaṟo hapfo, hose.

⁵ Luchihiyo kya okiṟo lopfo, Luiriye bendeṟa tsadu huye kipfa kya rina lya Ruwa odu; Mndumii nakuinenge shapfo shose uhuṟi.

⁶ Wulalu ngamanya ke Mndumii nyi akiṟa mshimbuo oke, Njechimhaluo awuka Ruwehu koke kwele. Kui mawuto hake hang'anyi hekiṟa Ha owoko loke lo kulyo.

⁷ Iwa wahamba magari, na iwa frasi, Indi so losenda Rina lya Mndumii, Ruwa odu.

⁸ Wo wahongoma wakaoloka, Indi so lokuiria na ihoṟoka.

⁹ Mndumii kiṟa mangi, Uludikye mkonu luikulaha.