SHIIMBO SHA DAWIDI 2 - Bibilia Kui Mdedie fo Kimochi

Mangi Msambuṟe o Ruwa

¹ Nkili wandu wa mkambo waira kitohiyo, Na mbaṟi tsa wandu waikusaṟa shindo sha mai?

² Wamangi wa wuyana waikuteseheṟa, Na wanene wawada chila handu hamu, kipfa kya Mndumii, na Mesia oke

³ Luranduo shipfungo shawo, Lukaumbe kuleshi naso shiwoho shawo.

⁴ Icho adamye ruwehu nakeri-seka, Mndumii nyi akeri iwataluo.

⁵ Nyi echideda nawo kui nyashi yake, Na iwaawisha moo kui nyashi yake.

⁶ Inyi nyi njilemtana mangi yako Ipfo Sioni fumvunyi lyako yele.

⁷ Njechionguo mawawaso; Mndumii alenjiwia, nyi iyo manoko, Inyi nyi inu ngakufee.

⁸ Unjiterewe, na inyi njechikuinenga mbaṟi tsa wandu wawe kyoṟa kyapfo, Uweitoṟya mṟasa mtsitsionyi fo wuyana.

⁹ Nyi ochiwakapa na iṟiinga lya menya, Na iwapaṟapaṟa cha kihiya kya teri.

¹⁰ Na wulalu, nyo wamangi, wadenyi wurango, Nyo walaanyi wa wuyana, ṟanguonyi.

¹¹ Ṟundienyi Mndumii-Ruwa kui wuhoṟotsu Kyesenyi na idedema.

¹² Wadenyi shilya shi shicha, kundu naladose nyashi modeka njia, kipfa nyashi yake yechiaka oweṟe, Nanga walya wekemdichilia.