SHIIMBO SHA DAWIDI 18 - Bibilia Kui Mdedie fo Kimochi

Kiimbo Kya Uwinzi

(Ko msongoru o waimbi: Kiimbo kya Dawidi, mṟundi o Ruwa, aleimbia Ruwa kiheri alemashuo mawokonyi ha Sauli na watwaṟi wengi)

¹ Iyo Mndumii, pfinya tsako, njikukundi mnu,

² Mndumii nyi ngina yako, na mfiṟiha foko, na mkiṟa oko. Ruwa oko, iho lya iṟaṟa njekemdichia, Ngawo yako, na ombe lo okiṟo loko na mfiṟiha foko.

³ Njechilaha Mndumii ichu awaṟi iṟumisho, Njechiashuka ko wakituwa wako.

⁴ Shiwoho sha opfu shilenjioṟowia, Mamṟinga ha wunyamaṟi halenjiowesha.

⁵ Shiwoho sha handu ha wapfu shilenjioṟowia; Mdeho ya opfu iwenjidehe koko.

⁶ Wukiwenyi woko njilelaha Mndumii, Na ifuhiya Ruwa oko; Kaicho ṟu lyako hekalunyi lyake, Kilio kyako kikaida na madunyi hake.

⁷ Nyi lyondi oruka luledihina na idedema, Njotende tsa mafumvu tsikapongika, Iledihina kipfa nyi awewodo nyi nyashi.

⁸ Mbuo tsake tsikawuta mtsu, Modo fukawuka dumbunyi lyake fukalya, Okaa lukaatso nyifo.

⁹ Nyi alearamitsa ngina kasoka, Kukawada meema fung'anyi shiya madende hake.

¹⁰ Kadooya huye ya kerubi karunduka Ee, nyi alerunduka owinyi huye ya makungo ha otanu.

¹¹ Nyi aletana meema handu hake heowa, Fuwe hema lyake lyemṟingichia; Meema fo mṟinga na mapuchi manene ha ruwehu.

¹² Wookya sa iwei oshangunyi loke, Kukaida mapuchi hake manene, Mvuo ya manzaho na okaa lo modo.

¹³ Mndumii nyi alekapa ikuṟuṟuma ruwehu, Icho Ai huye kadeda na ṟu lyake, Mvuo ya manzaho na okaa lo modo.

¹⁴ Nyi alekapa na mfi kawarahanyitsa, Ee, mbawa tsifoi mnu kawarahanyitsa.

¹⁵ Nyi hondo kulewonekaho okondo lo mṟinga, Njotende tsa wuyana lukashukuo. Ee Mndumii, kui idedia lyapfo Kui ifiliya lya mṟufu fo mbuo tsapfo.

¹⁶ Nyi aledika awuka huye kanjiwada, Kanjiwuta mṟingenyi fufoi.

¹⁷ Kanjikiṟa na mkituwa oko awode pfinya, na walya wawensuo kipfa wawewode pfinya kota inyi.

¹⁸ Walenjiosha kiheri kya wukiwa woko, Indi Mndumii kawa ngaya yako.

¹⁹ Kanjiwuta kanjiduo handu hawode maanya; Kanjichiṟa kyamba nyi alechihiṟo nyi inyi.

²⁰ Mndumii kanjiwutia kiṟinganyi na wusumhanyi woko, Kiṟinganyi na wuele wo mawoko hako kanjitaa.

²¹ Kipfa njiwode mawawaso ha Ruwa, Manya njilelekana na Ruwa oko pfo.

²² Mdumbuye yake yose iwei oshangunyi loko, Manya njilekushowa na mawawaso hake pfo.

²³ Inyi njiwei na wusumhanyi oshangunyi loke, Ngawekuringa na mawicho hako.

²⁴ Kyamba Mndumii kanjitaa kisumanye mawuto hako, Sumhana na wuele wo mawoko hako oshangunyi loke.

²⁵ Ko mndu awode osaṟio nyi ochiwa menyi osaṟio, Ko mndu asumhanyi nawo ukuloṟe mndu asumhanyi.

²⁶ Ko mndu mokuilisha nyi ochiwa mwele, Ko mndu mokudetsa nyi ochiwa menyi mtoolo.

²⁷ Kipfa iyo nyi ochikiṟa wandu wawonyio, Na meso ha wutimbiri nyi ochihasotsa.

²⁸ Kipfa iyo uatsa taa yako; Mndumii-Ruwa oko anjiwaṟya meema foko.

²⁹ Kui ndarama yapfo njikapana na wandu shida, Kui pfinya ya Ruwa oko ngarunduka omombo.

³⁰ Ruwa, njia tsake tsisumhanyi, Kyasa kya Mndumii kikiṟingishye, O nyi ngawo yawo, Woose wekemdichia.

³¹ Kyamba nyiu ai Ruwa shile Mndumii? Nyiu ai iho lya iṟaṟa shile Ruwa odu?

³² Ruwa nyio anjipfungie okowa lo pfinya, Nao nyio ahaluye njia yako iwe njihoṟotsu.

³³ Kakarisha madende hako cha sariha, Kanjihoṟotsa handu hako ha huye.

³⁴ Nekelosha mawoko hako mbonyi tsa shida, Mawoko hako hakalema wuda wo menya ya aṟeṟa.

³⁵ Iyo nolenjiinenga ngawo ya okiṟo lopfo, Owoko lopfo lulyo lulenjiṟihika; Na wuhoo wopfo wukanjitoṟisha.

³⁶ Kowuta shilya shenjitewa njienyi, Ma madende hako halarendie.

³⁷ Njechikapa mteeṟa fo waliya wakituwa mṟasa njiwawone Njewuya numa pfo mṟasa ngawatoromisha shile ngawarumatsa pfo.

³⁸ Njechiwaombotsa wanda walechihoṟoka, Wechiomboka shiya madende hako.

³⁹ Na Iyo nokenjiinenga okowa lo pfinya tsehesha ngapano, Koweombotsa wakituwa wako shi yako.

⁴⁰ Ee kotana wakituwa wako wanjikumbe mhongo, Na walya walenjisuo njilewamamiṟa.

⁴¹ Waleeṟeṟa kyaindi kuwode mowakiṟa pfo Walelaha mndumii nalawahaluo.

⁴² Njilewapaṟapaṟa wakawa cha kiluli kiwiwito nyi otanu, Ngawakumba nja cha madoko ha njienyi.

⁴³ Ulenjikiṟa na marekiano ha wandu, Konjihaluo mdo fo mkambo ya wandu wafoi; Wandu ndawewaichi walenjiṟudia.

⁴⁴ Kui iicho mbonyi tsako, oweṟe wakanjiindia Wahenu walenjichea wechikunyiiṟa.

⁴⁵ Wahemu wechiuṟa ukahari wowo, Walecha wechidedema wawuka mfiṟihenyi yawo.

⁴⁶ Mndumii ni ai na moo, Naṟumisho o ai iṟaṟa lyako; Naichiko Ruwa o okiṟo loko.

⁴⁷ Nyio Ruwa anjitaaya kiṟaache, Na itoromisha wandu shi yako.

⁴⁸ Nyi ekenjiletsa na wakituwa wako, Ee, nokenjiiria huye ya iwo walekuiria huyako, Na injiletsa na mndu o wungarama.

⁴⁹ Nahong'u Mndumii, njechikuana kiidi kya wandu, wa mkambo Njechiimbia rina lyapfo.

⁵⁰ Na inenga Mangi yake okiṟo lung'anyi, Kawutia mecha mshimbuo oke; Dawidi na kishari kyake mlungana.