SHIIMBO SHA DAWIDI 17 - Bibilia Kui Mdedie fo Kimochi

Kiterewo kya mndu asumhanyi

(Kiterewo kya Dawidi)

¹ Hoi Mndumii, keichowo kiilohi, noadanyie kifihiṟo kyaho, Deha kudu, kopfo noicho shiterewo shako; Shiwuka dumbunyi lilawode mtambo.

² Mwanduye foko fukuwukie kopfo, Meso hapfo haambuye mbonyi tsa sungusihu.

³ Nyi ulehesha ngoo yako; ulenjichea kio; Omenjitiichia kulawone kidedo Njikuteseheṟye dumbu lyako lilaashe.

⁴ Mawuto ha wandu chando hai, Kui idedo lya dumbunyi lyapfo Ngakuṟisa na njia tsa wenyi ulang'a.

⁵ Ndifo tsako tsiwadanyi na njia tsapfo, Ohendo loko ludekie pfo.

⁶ Hoi Mndumii-Ruwa, ngakulaha kipfa nochiidikya, Deha kudu kopfo uicho idedo lyako.

⁷ Loṟa na pata mecha hapfo ha kiṟiha, Iyo nokekiṟa wekudichia wose, Kui owoko lopfo lo kulyo, Uwaashuo na iwo waiwatengetia.

⁸ Kyenjiringa cha njeche ya riso Kenjiwika shiya maria ha makungo hapfo;

⁹ Kundu walanjiwone walawode wusumhanyi wainjiwonyia, Wakituwa wa mrima foko wainjitengetia.

¹⁰ Wakahaṟie ngoo tsawo, Kui madumbu hawo waikushela.

¹¹ Wulalu watengetia ohendo loko, Wailutuluya meso hawo waluolotse wanda.

¹² Cha miiso akundi iranduo-randuo, mbaṟi ya mana o miiso ailayalaya mdehonyi foke.

¹³ Hoi mndumii, kehoṟoka, nokumbuhanane nao, nomwaramitse,. Kui oshu lopfo noashuo mrima foko na mndu mbicho.

¹⁴ Hoi Mndumii, kui owoko lopfo unjikiṟe na wandu Wandu wa wuyanawu, ohawi lowo Lui kiidi kya ohendo lowo lo moo. Wakaichuṟa ndeu tsawo na kisa kyapfo Wakaihuda wana, wakadeeya wana wawo shisa shawo.

¹⁵ Kyaindi inyi njikuirie meso hako kiidi kya kiilohi kyapfo. Mandi ngakure njiihutso oshangunyi lopfo.