SHIIMBO SHA DAWIDI 16 - Bibilia Kui Mdedie fo Kimochi

Iterewa Oringo ko Mndumii-Ruwa

(Kiimbo kya Dawidi)

¹ Hoi Ruwa, unjiringe, Kipfa ngadichia kopfo.

² Njilewia Mndumii, Iyo nyi Mndumii oko; Njiwode wucha shile nyi wulya wopfo pfo.

³ Waele wai wuyana nyiwo wai wecha, kyawo njilechihiyo.

⁴ Fowa tsawo tsechifo Walya wekeilacha Ruwa na kindo kingi; Njechiwuta kidaso kyawo kya samu pfo, Ma isenda marina hawo dumbunyi lyako pfo.

⁵ Mndumii-Ruwa nyi ohawi lo kichau kyako, Na lo kirahu kyako Iyo nowade kuṟukuhya koko.

⁶ Shiwoho shako shileombokya hecha, Ee-ko, ngakuwonya kyooṟa kicha.

⁷ Njechiṟumisha Mndumii alenenga oloho, Ee, mrima foko fulenjilosha kio.

⁸ Njiwikie Ruwa kusonguo koko orio kiheri, Kyamba ai ora loko lo kulyo njechidekapfo.

⁹ Kui kipfa ikyo, mrima foko fumchihiye, Na kiṟumi kyako kikeri ikesa; Ee, na mbihu foko fochikaa kikusirionyi.

¹⁰ Na njiweichi ochinjilekia njideke pfo, Manya ochida mcha opfo nanyamaṟikye pfo.

¹¹ Nochinjiloṟa njia ya moo, Oshangunyi kopfo kuwode sia sele, Mahinyi hapfo na owoko lopfo lo kulyo, Kuwode mecha ha mlungana.