SHIIMBO SHA DAWIDI 148 - Bibilia Kui Mdedie fo Kimochi

Wuyana wose wuṟumishe Ruwa

¹ Haleluya! Ichikenyi Mndumii kuwuka ruwehu; mwichikenyi handu hai huye.

² Mwichikenyi, lanye malaika wake mose; Mwichikenyi, matorito hake hose.

³ Mwichikenyi, mnengeṟi na meri; mwichikenyi, nyenyeri tsose tsiwode sa.

⁴ Mwichikenyi, nyo ruwehu lya ruwehu, nanyo mṟinga mui huye ya ruwehu.

⁵ Shikeichika rina lya Mndumii, kyamba nalewawasa, shikaumbo.

⁶ Naleshiiṟicha itane mlungana na mlungana, nalewika iwawaso manya lyechiidapfo.

⁷ Ichikenyi Mndumii kuwuka orukenyi, nyo makunga hang'anyi na kundo kose kuṟungukie!

⁸ Modo na mvuo ya manzaho, mṟinga fo maho na omunyi, Otanu lo kiwiṟi lokewika idedo lyake.

⁹ Mafumvu na shitoṟomoso shose, mashidi hawode ndunda na mieresi yose.

¹⁰ Mando ha nja, na shuma sha mba, shekeafuo, na shilehe shiwode makungo.

¹¹ Wamangi wa wuyana, na wandu wose, wanene, na wachili wose wa wuyana.

¹² Wanake, na wana wa kika, wameku, na wana watutu;

¹³ Wakeichika rina lya Mndumii, kyamba rina lyake lyiilenyi lyiwode kiṟumi king'anyi, mng'ano foke fui huya oruka na ruwehu.

¹⁴ Nao naleinenga wandu wake pfinya, na kiṟumi ko waheṟemtsu wake wose, wana wa Israeli, wandu wai kufui nao. Haleluya!