SHIIMBO SHA DAWIDI 146 - Bibilia Kui Mdedie fo Kimochi

Kiṟumi ko Ruwa Mkiṟa

¹ Haleluya! Hoi mrima foko, ṟumisha Mndumii,

² Njechiṟumisha Mndumii kiheri njii na moo, njechimbia Ruwa oko ili njii na moo.

³ Mulakusirie wanene, manya mndu o wandu icho okiṟo lulai koke.

⁴ Mṟufu foke fokewuka, nekewuya teri yake, mfiri fo mahiyo hake hekedeka.

⁵ Nanga ulya Ruwa o Yakobo nyi mtarami oke, na kikusirio kyake nyi ko Mndumii, Ruwa oke.

⁶ Alewika ruwehu na oruka, ipalyipalyi na shose shiipfo. Nekewada kiilohi mlungana,

⁷ Nekeanduya walewonyio, nekeinenga wawodo nyi njaa kelya; Mndumii nekepfunguo walepfungo.

⁸ Mndumii neketambaṟuo meso ha walya wapfu meso; Mndumii nekeira walya waarami; Mndumii nakundi wawode wusumhanyi.

⁹ Mndumii nekeowisha wahenu; Nekeṟihika mngoeda na mkusu; kyaindi njia ya walai na wusumhanyi nekeidetsa.

¹⁰ Mndumii nechiikolonyia mlungana, Ruwa opfo, Iyo Sioni, marika na marika. Haleluya. Ichikyenyi Mndumii.