SHIIMBO SHA DAWIDI 145 - Bibilia Kui Mdedie fo Kimochi

Kiimbo kyeana Ruwa

(Kiimbo kyeichika kya Dawidi)

¹ Hoi Ruwa oko, Mangi, njechikung'anyisha; njechiadapfuma rina lyapfo mlungana na mlungana.

² Orio mkonu njechikuadapfuma; Njechiichika rina lyapfo mlungana na mlungana.

³ Mndumii nyio mnene ekeichiko mnu, Manya unene woke wumanyikiepfo.

⁴ Marika na marika wechiichika mawuto hapfo, Wechihaonguo mawuto hapfo manene.

⁵ Njechikusaṟa kya wulole wo kiṟumi kicha kyapfo, na mawuto hapfo hose ha ṟiho.

⁶ Wandu wechisenda mawuto hapfo haoweshie; na inyi njechionguo wunene wopfo.

⁷ Wechionguo ngumbuo ya wucha wopfo wung'anyi, Wechiimba wusumhanyi wopfo.

⁸ Mndumii nawode isaṟia, naichuo makulyilyi, ekewado nyi nyashi owinyipfo, naichuo wuoloru.

⁹ Mndumii nyi ai mcha ko wandu wose, na wuoloru woke wui huya maṟunda hake hose.

¹⁰ Hoi Mndumii, maṟunda hapfo hose hechikuana, na weindia Ruwa wapfo wechikuadapfuma.

¹¹ Wechideda kiṟumi kya wumangi wopfo, na ionguo wuidimi wopfo.

¹² Kundu wamanyishe wandu mawuto hake manene, Na kiṟumi kya wulole wo umangi woke.

¹³ Wumangi wopfo nyi wumangi wo kacha mṟamna, Mndumii-Ruwa nai mhendeli kiidi kya shasa shake shose, na mcha kiidi kya mawuto hake hose. Na wuikolonyi wopfo nyi wo marika hose.

¹⁴ Mndumii nekeṟihika wose wekeoloka, nekeiria wose walearama wanda.

¹⁵ Meso ha wandu wose hakuhalukia Iyo, na iyo nokewainenga kelya kyawo kiheri kyake.

¹⁶ Noketambaṟuo owoko lopfo, koihutsa orio kii na moo chandu kikundi.

¹⁷ Mndumii nawode wusumhanyi njienyi tsake tsose, nyio menyi osaṟio huye maṟunda hake hose.

¹⁸ Mndumii nai kufui na wose wekemlaha, wose wekemlaha kui wuhendeli.

¹⁹ Nechiwutia iwo wamwindie isho wakundi, nao nechiicho kieṟeṟo kyawo na iwakiṟa.

²⁰ Mndumii nekeringa wose wamkundi, na wose walai wasumhanyi nechiwarumatsa.

²¹ Dumbu lyako lyechihamba kiṟumi kya Mndumii; wose wawode mbihu wakeadapfuma rina lyake liele mlungana na mlungana.