SHIIMBO SHA DAWIDI 144 - Bibilia Kui Mdedie fo Kimochi

Kiano kya wuwinzi

(Kiimbo kya Dawidi)

¹ Kuadapfumo Mndumii, iṟaṟa lyako, ekelosha mawoko ha hako shida. Shimnyo shako ikapana.

² Mombele oko na mfiṟiha foko, omombo loko na mkiṟa oko, ngawo yako njilembingia, eketoromisha wandu wako shiako.

³ Hoi Mndumii, mndu nkiki tane ommanya? Na mndu o wandu tane omwambuya?

⁴ Mndu o wandu nai cha wulya, mfiri yake ii cha kiṟinje kiida.

⁵ Mndumii, aramitsa ruwehu yapfo, nosoke, nopaaye mafumvu naho hawute mtsu.

⁶ Keluinenge mbawa, nowanyanyaṟitse, nolase mfi yapfo, nowatandawushe.

⁷ Hoṟuo mawoko hapfo kuwuka huye, nonjikiṟe, nonjiwute kiidi kya mṟinga fufoi, mawokonyi ha wahenu.

⁸ Madumbu hawo hekededa shilawaṟi; na owoko lowo lo kulyo nyi owoko lo wongo.

⁹ Hoi Mndumii, njechikuimbia kiimbo kihya, Kui kinanda kiwode ndusu ikumi njechikuimbia.

¹⁰ Ekeinenga wamangi okiṟo, mokiṟa Dawidi, mṟundi oke, na oshu lo wuwicho.

¹¹ Kenjikiṟa, nonjiwute, kiidi kya owoko lo wahenu. Madumbu hawo hekededa shilawaṟi, na owoko lowo lo kulyo nyi owoko lo wongo.

¹² Wana wadu wawe cha shiana mdeminyi, wang'anyie kiidi kya warika. Na wana wadu wa kika cha ngo tsa ndumbenyi, tsileṟehoṟeho tsichope hekalu.

¹³ Shikumbi shadu shikeichuo; shiwode kisa kya mbaṟi tsose, machondi hadu hakeshaa shiku na shiku makumi mademenyi hadu.

¹⁴ Mmbe tsadu tsikekudika mamhanda, kulakaepfo ipufutso. Manya kulakaepfo isamiṟo, manya ihataṟo njienyi tsadu.

¹⁵ Nanga wandu wawode mwichiwefo, nanga wandu wawode Mndumii cha Ruwa owo.