SHIIMBO SHA DAWIDI 143 - Bibilia Kui Mdedie fo Kimochi

Iterewa ndarama

(Kiimbo kya Dawidi)

¹ Hoi Mndumii, keicho kiterewo kyako, keadanyiawo shieṟeṟo shako, kui wuhendeli wopfo nonjiṟohuo kui wusumhanyi wopfo.

² Manya kulaanduye mṟundi opfo, kyamba kopfo kuwode msa ai na moo awode wusumhanyipfo.

³ Kyamba mkituwa naleṟinjawia mrima foko, nalekumba wanda moo foko. Nalenjidamiṟa handu hawode meema, cha wandu wapfie kacha.

⁴ Na ngoo yako ileuma nguku kiidi kyako, na ngoo yako kiidi kyako ilekangaṟika.

⁵ Njilekumbuo mfiri ya ili mbooko, njileweṟuwetsa mawuto hapfo hose, njikusaṟa kya maṟunda ha mawoko hapfo.

⁶ Ngakuleshia mawoko hako; mrima foko fukuichuo uwangari cha oruka luumu.

⁷ Hoi Mndumii, kenjihaluo faṟa, ngoo yako yalehela; manya kulanjiṟike kyamu kyafo, njilafanane na iwo waisokia ṟungunyi.

⁸ Kenjihaluo iicho wuoloru wopfo ngamenyi, kyamba njikuwedia Iyo. Nonjimanyishe njia njechihenda; Kyamba njikuiria mrima foko.

⁹ Hoi Mndumii, kenjiashuo na wakituwa wako, njilekuwingia Iyo, nonjiṟike.

¹⁰ Kenjilosha iwuta isho ukundi, kyamba nyi iyo ui Ruwa oko; Mumuyo fopfo mcha funjiteteṟe orukenyi lo lohi,

¹¹ Hoi Mndumii, njiwihiṟia moo kui rina lyapfo; kui wusumhanyi wopfo kewuta ngoo yako wukiwenyi;

¹² Kui isaṟia lyapfo nochiarisia wanda wakituwa wako; na irumatsa iwo wose wailisa mrima foko wukiwa; kyamba inyi njii mṟundi opfo.