SHIIMBO SHA DAWIDI 141 - Bibilia Kui Mdedie fo Kimochi

Ndenga tsa lango mbicho

(Kiimbo kya Dawidi)

¹ Hoi Mndumii, njilekulaha, kenjichea faṟa, noicho ṟu lyako matika njiikulaha.

² Kiterewo kyako kido kishike oshangunyi lopfo cha opfamo; njechiiria mawoko hako cha kidaso kya kyukanyi.

³ Hoi Mndumii, kewika mringi dumbunyi lyako, mowedia mongonyi fo momu yako.

⁴ Kulaṟungamishe mrima foko handu kuwode mbonyi njiwicho, njilacheiichiwia mawuto halewa, handu hamu na wandu wekewuta wunyamaṟi; manya njilalye shelya shawo sha useṟeṟi.

⁵ Mndu awode wusumhanyi nanjikape, kechiwa wucha; nanjipomie kechiwa cha mafuda mdonyi; mdo foko fulalehe, kyamba njekeda iterewa kiidi ya mawicho hawopfo.

⁶ Wachili wawo wakaolotso mbai ya kituṟu kya wandu. Wechiicho madedo hako, kyamba hekeloda.

⁷ Chandu ipaṟa ngu lii na itsisengasenga orukenyi, nyi wudo kikeri mafuo hadu dumbunyi lyo ko waṟumu.

⁸ Meso hako hekekuambuya Iyo; Mndumii-Ruwa, njilekuwingia Iyo, kulalekie mrima foko.

⁹ Unjiringe na kiṟiwa walenjidehia, na mdeho ya nzingonyi ya iwo wewuta mawicho.

¹⁰ Wawicho wakeoloka kiidi kya mdeho, yawo wawenyi ya ndusu. Kiheri kyo inyi njikuidiaho na kipuo.