SHIIMBO SHA DAWIDI 140 - Bibilia Kui Mdedie fo Kimochi

Iterewa wuringi wo Ruwa

(Ko Msongoru o waimbi: Kiimbo kya Dawidi)

¹ Hoi Mndumii, kenjiashuo na mndu mbicho, unjiowishe na mndu o wutimbiri.

² Wekekusaṟa mawicho ngoonyi tsawo, orio mkonu wekeamtsia shida.

³ Waohiṟie njolimi tsawo cha njoka, Wuṟoi wowaha wui shi ya momu yawo.

⁴ Hoi Mndumii, unjiringe na mawoko ha mndu alasumhanyi; nonjiashuo na mndu o wutimbiri; Walehia inyamaṟa njayo tsako.

⁵ Wawode wutimbiri walenjiṟikia mdeho na shiwoho; waleala ndusu tsa maṟawushi mbai ya njia; walenjiwikia mdeho ya nzingonyi.

⁶ Njilewia Mndumii, “Iyo nyi ui Ruwa oko.” Hoi Mndumii, keadanyia ṟu lya kiterewo kyako.

⁷ Hoi Mndumii-Ruwa, pfinya tsa okiṟo loko, kuleshikia mdo foko mfiri fo shida.

⁸ Hoi Mndumii, kulainenge msaalasumhanyi lango tsake, kulaawutsie mtambo yake, walashike ikuiria huye.

⁹ Nawo ili wairia mdo wandu wo wekenjitengetia, mawawiṟo ha momu yawo hawashikie wo wawenyi.

¹⁰ Okaa lo modo luwaolokie, wakumbo modonyi, maṟungunyi, walaidime ihoṟokase.

¹¹ Moiria wongo echiwikio owanzo orukenyipfo, Mndu o wutimbiri, wuwicho wokemṟinjawia imkombetsa.

¹² Njiichi ke Mndumii nechiinenga mfafa mdumbuye, na wawuṟie kilya kiwawaṟi.

¹³ Nkya lohi wawode wusumhanyi wechiana rina lyapfo, wawode wuhoṟotsu wechikaa oo handu Iyo ui.