SHIIMBO SHA DAWIDI 135 - Bibilia Kui Mdedie fo Kimochi

Kiṟumi ko Ruwa

¹ Haleluya! Ichikenyi rina lya Mndumii, Lanye waṟundi wa Mndumii, ichikenyi.

² Nyo mokehoṟoka mbenyi ya Mndumii, mfiṟihenyi ya mba ya Ruwa odu.

³ Ichikenyi Mndumii kyamba Mndumii nai mcha, imbienyi rina lyake kipfa lichihiṟie.

⁴ Cha kipfa Mndumii nalekusambuṟia o Yakobo, na Israeli, wawe wandu wake nakamu.

⁵ Kyamba njiichi inyi ke Mndumii nai mnene, na Mndumii odu nai huya maruwa hose.

⁶ Mndumii nalewika orio kindo kilemchihiṟa. Ruwehu na orukenyi. Ipalyipalyinyi na shi ya ipalyipalyi shose.

⁷ Nyio ekedosa mmeṟa kuwuka mtsitsionyi fo oruka, Nekeinenga mvuo mbawa, kaende otanu kuwuka kimaenyi kyalo.

⁸ Nalekapa wawee wa Misri, wa wandu na wa mando.

⁹ Naledika ofano na maṟiho kiidi kyapfo, Iyo Misri, ko Farao na waṟundi wake wose.

¹⁰ Nalekapa wa mkambo ingi, kawaha mangi tsiwode pfinya;

¹¹ Sihoni, mangi ya Waamori, na Ogu, mangi ya Bashani, na mangi tsose tsa Kaanani.

¹² Kalekia oruka lowo luwe kyoṟa, kyoṟa kya Israeli wandu wake.

¹³ Hoi Mndumii, rina lyapfo nyi lya mlungana, Mndumii, ngumbuo yapfo marika na marika.

¹⁴ Cha kipfa Mndumii nechiletsa wandu wake, nechisaṟia waṟundi wake.

¹⁵ Mando mapache ha wa mkambo nyi fesa na sahabu, iṟunda lya mawoko ha mndu o wandu.

¹⁶ Hawode madumbu indi hekededapfo, hawode meso indi hekewonapfo,

¹⁷ Hawode madu indi hekeichopfo, manya hawode mṟufu ipfo madumbunyi hawopfo.

¹⁸ Iwo wehapacha wechifanana naho, na orio umu aitsiwedia.

¹⁹ Lanye wa mongo fo Israeli, ichimbiṟenyi Mndumii, lanye wa mongo fo Aroni, ichimbiṟenyi Mndumii,

²⁰ Lanye wa mongo fo Lewi, ichimbiṟenyi Mndumii; nyo mokeichika Mndumii, ichimbiṟenyi Mndumii.

²¹ Kuadapfumo Mndumii kuwuka Sioni icho ekekaa Yerusalemu. Haleluya!