SHIIMBO SHA DAWIDI 132 - Bibilia Kui Mdedie fo Kimochi

Kiṟumi kya mba ya Ruwa

(Kiimbo Kehenda Huye)

¹ Mndumii, kekumbuo wo Dawidi wukiwa woke wose alewulya.

² Nyio aleliia Mndumii nyamu, alewika kyasa ko ngohoda yo Yakobo.

³ Njechiida na ihemenyi lya mbenyi yakopfo, manya njechidoya njonyinyi ya kitaṟa kyakopfo;

⁴ Njechilekia meso hako hawado nyi madopfo, manya mbawa tsako tsihombiepfo;

⁵ Mṟasa njechiwonyia Mndumii mwanya, na ngohoda o Yakobo handu hekaa.

⁶ Ambuya, luleicho mbonyi tsake kulya Efrata, kiidi kya dema lya Yearimu luleiwona.

⁷ Kenndenyi luide na handu hake hekaa, luadapfume kidinyi kyake kehekia madende hake.

⁸ Hoi Mndumii, kekure, uide na sienyi yapfo, iyo na isanduku lya pfinya tsapfo.

⁹ Wakohanyi wapfo waṟiko wusumhanyi, wahoṟotsu wapfo wakape ngululu.

¹⁰ Kipfa kya Dawidi, mṟundi opfo, kulawihiṟe na numa kyamu kya mshimbuo opfo.

¹¹ Mndumii naleliia Dawidi nyamu idedo lya lohi, echiwuya numa nalitehiepfo, washari maata wapfo kulewafee, njechiwawika loṟikehu lopfo lo wuitoṟi.

¹² Wana wapfo wawada mawawaso hako, na wuṟingishi njechiwalosha; Wana wawo nawo wechidamia loṟikehu lopfo lo wuitoṟi mlungana.

¹³ Kyamba Mndumii nalesambura Sioni, naleilanga nakae kiidi kyake.

¹⁴ Oo nyi handu hako ha sia ya mlungana, nyihondo njechikaa kyamba njiwelangieho.

¹⁵ Kya lohi njechiwikia Shelya shake mboṟa, wandu wake wawuṟie njechiwaihutsa shelya.

¹⁶ Na wakohanyi wake njechiwaṟika okiṟo, na wahoṟotsu wa mrimenyi wake wechikapa ngululu.

¹⁷ Oo nyi handu njechialutsia Dawidi ombe, na njilesungusia mshimbuo oko taa.

¹⁸ Wakituwa wake njechiwaṟika wusutsu, kyaindi huye yake oṟo yake yechiṟimba.