SHIIMBO SHA DAWIDI 128 - Bibilia Kui Mdedie fo Kimochi

Wueri ko wandu weindia Ruwa

(Kiimbo Kehenda Huye)

¹ Wungusu orio mndu aowoe Mndumii, ekechumia kiidi kya njia tsake.

² Wukiwa wo mawoko hapfo kya lohi nochikulia; nochiwa wungusu, na ikaapfo necha.

³ Mka opfo nechiwa cha msabibu fukumbie ndunda, shiṟihenyi sha mba yapfo, wana wapfo cha njaana tsa msabibu, wechitengetia mesenyi yapfo.

⁴ Ambuya, nyi wudo mnduchu aowoye Mndumii echiwikio mboṟa.

⁵ Mndumii nakuwikie mboṟa kuwuka Sioni, Nokaeho kudo mfiri yose ya moo fopfo, ochikusekia na seko tsa Yerusalemu.

⁶ Ee da, uwewonaho wana wa wana wapfo. Ofoṟo lukae na Israeli.