SHIIMBO SHA DAWIDI 118 - Bibilia Kui Mdedie fo Kimochi

Kiterewo Keana

¹ Haleluya Anenyi Mndumii kyamba o nai mcha, Kyamba wuoloru woke nyi wo mlungana.

² Israeli nahambe wulalu, Kye wuoloru woke nyi wo mlungana.

³ Mongo fo Aronyi wahambe wulalu, Kye wuoloru woke nyi wo mlungana.

⁴ Wekyeindia Mndumii wahambe wulalu, Kye wuoloru woke nyi wo mlungana.

⁵ Kiidi kya wukiwa woko njilelaha Mndumii, Mndumii kanjiidikia kanjiwika handu hawewode mwaanya.

⁶ Mndumii nai ora loko, njechiowuopfo; Mndu o wandu nechinjiwutia ki?

⁷ Mndumii nai ora loko, mtarami oko Ko ikyo njechiwona iwo wanjisuo wechiwingo.

⁸ Nanga iwingia Mndumii Kota ikusiria wandu.

⁹ Nanga iwingia Mndumii, Kota ikusiria wanene.

¹⁰ Wa mkambo yose walenjitengetia; Kui rina lya Mndumii njilewaarisia kuleshe.

¹¹ Walenjitengetia, ee da, walenjitengetia; Kui rina lya Mndumii njilewaarisia kuleshe.

¹² Walenjitengetia cha njuki, Wakaruma cha modo fo mshenyi; Kui rina lya Mndumii njilewaarisia wanda.

¹³ Kulenjitsindika mnu kundu njioloke; Kyaindi Mndumii kanjitarama.

¹⁴ Mndumii nyi pfinya tsako na kiimbo kyako, Nao nalewa okiṟo loko.

¹⁵ Ṟu lya sia na okiṟo Likeri ipfo ihemenyi lya wawode wusumhanyi, Kuwoko ko kulyo ko Mndumii kokewuta shinene.

¹⁶ Kuwoko ko kulyo ko Mndumii kuleichiko; Kuwoko ko kulyo ko Mndumii kokewuta shinene.

¹⁷ Njechipfapfo indi njechikaa na moo, Na inyi njechionguo mawuto ha Mndumii.

¹⁸ Mndumii nalenjituura mnu, Kyaindi nalanjilekie njipfe.

¹⁹ Njipfunguyenyi mongo ya wusumhanyi, Njechiida napfo na iana Mndumii.

²⁰ Mongo fu nyi fo Mndumii Wai wa wusumhanyi nyiwo wechiida napfo.

²¹ Njechikuana kyamba kulenjiṟohuo, Na iyo kulewa okiṟo loko.

²² Iho wewika mba waliminyie Lyamewa iho linene lya ndumbenyi.

²³ Idedolyi lyiwukie ko Mndumii, Nalyo nyi lya kiṟiha mesonyi hadu.

²⁴ Mfiri fu nyi fumsungusie nyi Mndumii, Lochikapa ngululu na ichihio kyafo.

²⁵ Hoi Mndumii, kyelukiṟe, lokuterewa; Hoi Mndumii, uluinenge ihuyo, lokuterewa.

²⁶ Nawikio ona ichu acha kui rina lya Mndumii; Lulewawikia ona kuwuka mmbenyi ya Mndumii.

²⁷ Mndumii nyio ai Ruwa, Nao nyio aluinengie sa. Pfungenyi shidaso na shiwoho Mbai ya rasionyi.

²⁸ Nyi Iyo Ruwa oko, na inyi njechikuana, Nyi Iyo Ruwa oko, na inyi njechikuadapfuma.

²⁹ Anenyi Mndumii kyamba o nai mcha, Kyamba wuoloru woke nyi wo mlungana.