SHIIMBO SHA DAWIDI 108 - Bibilia Kui Mdedie fo Kimochi

Kiterewo kekuringa na wakituwa

(Kiimbo kya Dawidi)

¹ Ee wo Ruwa, mrima foko fui mbanzi, njechiimba, njechiimba shiimbo! Kure, ee mrima foko!

² Kure, kinanda na kinubi! Njechikure otuko.

³ Hoi Mndumii, njechikuana kiidi kya wandu, njechikuimbia shiimbo kiidi kya wa mkambo.

⁴ Kipfa osaṟio lopfo nyi lung'anyi mṟasa ruwehu, na wuhendelyi wopfo mṟasa mapuchinyi.

⁵ Hoi Ruwa, uichiko huye ruwehu, na iya orukenyi kose kukae kiṟumi kyapfo.

⁶ Kundu mbuya tsapfo tsiashuke, nokiṟe kui owoko lopfo lo kulyo, nonjiidikie.

⁷ Ruwa nalededa kui wuele woke, na inyi njechikapa ngululu. Njechihawa Shekemu, njechihesha pichi lya Sukothi.

⁸ Gileadi nyi yako, na Manase nyi yako, na Efraimu nyi pfinya ya mdo foko. Yuda nyi ndichi yako ya wumangi,

⁹ Moabu nyi mboṟiko yako yesambia. Njechikumbia Edomu kyadu kyako njiitoṟie, na ikapia Filisti kitohio kya wuwinzi!

¹⁰ Nyiu echinjiduo tane mṟinyi fuwode omombo? Nyiu echinjiteteṟa mṟasa Edomu?

¹¹ Hoi Ruwa, chi iyo kulelukumba? Manya, hoi Ruwa, okekure na matorito hadupfo?

¹² Keluendie mtarami kiidi kya mtuuri, kyamba okiṟo lo mndu o wandu luiwapfo.

¹³ Kui kitarama kya Ruwa lochiwuta shinene, kyamba o nechichumachuma watuuri wadu.