SHIIMBO SHA DAWIDI 107 - Bibilia Kui Mdedie fo Kimochi

KITAPU KYA KATANU Kiṟumi ko Ruwa mcha

¹ Anenyi Mndumii kyamba o nyi mhoo, kyamba wucha woke nyi wo mlungana.

² Wahambe wadi iwo walekiṟo nyi Mndumii, walya alewaashuo mawokonyi ha mtuuri.

³ Kawasanyia kuwuka njorukenyi tsose, ora lo ngamenyi na lo kyukanyi, mtsudu na nuka.

⁴ Maata, waleṟahaṟaha nuka ya msanga; walawone mṟi fokaa.

⁵ Walewado nyi njaa, waleangaa, mrima fowo fakauma nguku kiidi kyawo.

⁶ Wakafihiṟia Mndumii kiidi kya kiwi kyawo, kawaashuo mawukiwenyi hawo.

⁷ Kawateteṟa kiidi kya njia njihoṟotsu, waidime ihenda mtano mṟinyi fokaa.

⁸ Na waane Mndumii kipfa kya wuoloru woke, na ṟiho tsake ko wandu.

⁹ Kyamba nekeihutsa mrima fulangie, na mrima fuwodo nyi njaa nekyeiichuṟa mecha.

¹⁰ Walya wai memenyi na mṟishenyi fo opfu, wawapfunge nyi mawukiwa na menya.

¹¹ Kipfa walelekana na madedo ha Ruwa, wakapiṟa kyama kyake icho ai huye.

¹² Kawatoromisha mrima kui wukiwa, wakakapa mtulia manya walawone mtarami.

¹³ Wakafuhia Mndumii kiidi kya kiwi kyawo, kawashuo mawukiwenyi hawo.

¹⁴ Kawawuta memenyi na mṟishenyi fo opfu. Kafunja shipfungo shawo.

¹⁵ Wakeana Mndumii kipfa kya osaṟio loke, na ṟiho tsake ko Wandu.

¹⁶ Kyamba nalefunja mongo ya menya ya aṟeṟa, kadumbuo mapfungo ha menya.

¹⁷ Matondo, kipfa kya wunyamari wowo; na kui kipfa kya wuwicho wowo, waikutuura.

¹⁸ Mrima yawo isuo orio mbaṟi ya kindo kyelio, wameshika kufui na mongo ya opfunyi.

¹⁹ Wakafihiṟia Mndumii kiidi kya kiwi kyawo; kawaashuo mawukiwenyi hawo.

²⁰ Nekeduma idedo lyake, iwaashuo, nekewawuta kiidi kya maarisikionyi hawo.

²¹ Wakeana Mndumii kipfa kya osaṟio loke, na ṟiho tsake ko wandu.

²² Wamnenge shiano shemṟumisha, na ionguo mawuto hake wechiimba.

²³ Wengi waisokia ipalyipalyinyi kiidi kya merikebu, waiṟunda iṟunda lyawo kiidi kya mṟinga fufoi,

²⁴ Iwo wekewona maṟunda ha Mndumii, na ṟiho tsake wanda ya ipalyipalyi.

²⁵ Kyamba nekehamba, kawiwita otanu lo kiwiri, lukoiria huye masinanu hake.

²⁶ Wedo na ruwehu, wesokia wanda ya ipalyipalyi, mrima fowo fuisalaa kipfa kya kiheri kiwicho.

²⁷ Waiṟumba-ṟumba, waitengeluka cha mndu mnanzi, wuṟango wowo wose wukawadekia.

²⁸ Wakafuhia Mndumii kiidi kya kiwi kyawo, kawaashuo mawukiwenyi hawo.

²⁹ Nekepomia kiwiṟi, kukowa ndiṟi, masinanu hake hakatsia.

³⁰ Nyilyo mandi walechihio kipfa haletsia; nao kawaduo mṟasa mṟi fo mbai ya ipalyipalyi wawefulangie.

³¹ Wakeana Mndumii kipfa kya osaṟio loke, na ṟiho tsake ko wandu.

³² Wakemwichimbiṟa kiidi kya kisanzio kya wandu; Wamwichike kiidi kya menge ya wameku.

³³ Nalehaluo meda ikawa nuka ilawode mṟinga; na soka tsa mṟinga tsikawa oruka lo wuangari.

³⁴ Oruka lo ndunda tsifoi lukawa rendewele ya mbala, kipfa kya wuwicho wo iwo waweleepfo.

³⁵ Nalehaluo nuka ilawode mṟinga ikawa nduwa ya mṟinga, na oruka luhadutsu lukawa soka tsa mṟinga.

³⁶ Kyamba nalelaṟapfo wawewodo nyi njaa, nawo walesungusia mṟi fokaa.

³⁷ Wakawaaya mbeu mademenyi, na iwikapfo misabibu ilekumbia ndunda tsayo.

³⁸ Nao nekewainenga mboṟa wakaengeṟeka mnu, manya ekeanguṟa mapo hawopfo.

³⁹ Numa wakaanguo na ikunyiira, kui iwonyio nyi mawicho na fowa.

⁴⁰ Kapusuya wanene wuilo, na iwatengesha kiidi kya nuka ilawode njia.

⁴¹ Kawika ulya awuṟie haleshe na matuuro, kambikia kishari cha ipo lya machondi.

⁴² Wahoṟotsu wa mrima wechiwona na ichihio, na wuwicho wo orio mbaṟi wochipfumbika dumbu.

⁴³ Msa awode osaaṟe naambuye isho; wakeweṟuwetsa osaṟio lo Mndumii.