SHIIMBO SHA DAWIDI 105 - Bibilia Kui Mdedie fo Kimochi

Ruwa na wandu wake

¹ Haleluya! Anenyi Mndumii-Ruwa, lahenyi rina lyake, manyishenyi wandu mawuto ho hake.

² Miimbienyi, miimbienyi kui shiimbo, weṟuwetsenyi ṟiho tsake tsose.

³ Kuichikenyi ko rina lyake liele, kechihio mrima fo iwo waishiha Mndumii. Haleluya nyi kimu na ihamba ichikenyi Mndumii.

⁴ Langenyi Mndumii na pfinya tsake, shihenyi kyamu kyake mkonu yose.

⁵ Kumbuonyi ṟiho tsake aletsiwuta, shiṟiha shake na mdumbuye ya dumbu lyake.

⁶ Lanye luwa lya Abrahamu, mṟundi oke. Lanye wana wa Yakobo, wasambuṟe wake.

⁷ O, Mndumii, nyio Ruwa odu, wuyanenyi kose kuipfo mdumbuye yake.

⁸ Nakumburie mkundana foke mlungana; idedo lilya aleliwawasia marika kiku.

⁹ Mkundana alefuwika na Abrahamu, na nyamu yake ko Isaki.

¹⁰ Alefuṟingishia Yakobo fuwe nyi iwawaso; na Israeli fuwe, mkundana fo mlungana.

¹¹ Kechihamba, “Njechikuinenga iyo oruka lo Kanaani, luwe kioṟa kyanu mleheshio.”

¹² Kiheri wawei wandu wewa iitalo, ee da, wandu waangu na wahenu kiidi kyalo,

¹³ Wakaṟumbaṟumba kuwuka mkambo tane mkambo, wokia wumangi wumu tane ko wandu wengi.

¹⁴ Alelekia mndu nawawonyiepfo, ma wamangi nalewapomia kipfa kyawo.

¹⁵ Kyechihamba; Manya mlapaye washimbuo wako, manya mlawutie kindo kiwicho waikimbi wako.

¹⁶ Kalaha njaa icheye oruka, kanyamaṟa kelya kyose wawekikusirie.

¹⁷ Kaduo mndu mbele yawo, Yosefu alekumbo wusingenyi.

¹⁸ Wakawawiṟa madende hake ko mshe, kawiko mnyonyoṟonyi ya menya.

¹⁹ Tane kiheri kyeawukia idedo lyake, kyasa kya Mndumii kikamhesha.

²⁰ Mangi naleduma wandu kampfunguo, mnene o wandu kamlekia.

²¹ Kammbika nawe mndumii o kanyi koke, awode iwawaso huya masaa hake hose.

²² Napfunge wasoṟo wake chandu akundi, na ilosha wameku wake wuṟango.

²³ Israeli nao kaida na Misri, Yakobo kawa mhenu orukenyi lo Hamu.

²⁴ Katana wandu wake wafee mnu, kawawuta wakawa ngohoda kota watuuri wawo.

²⁵ Kawahaluo mrima wasuo wandu wake, wakawutia waṟundi wake mtaambo.

²⁶ Kaduma Mose, mṟundi oke, na Aronyi msa alemsambuṟa.

²⁷ Kawika mbonyi tsa shichano shake kiidi kyawo, na shiṟiha orukenyi lo Hamu.

²⁸ Naleduma meema, kukawada meema orukenyi, manya waletehia madedo hakepfo.

²⁹ Nalehaluo mṟinga fowo fukawa samu, kawaha makunga hawo.

³⁰ Oruka lowo lukaichuo shilo, shiṟihenyi sha wamangi wawo.

³¹ Nalehamba, kukacha tendemra ya manzi, na nda mṟasenyi yawo yose.

³² Handu ha mvuo kawainenga mvuo ya manzaho, na modo fo olewo orukenyi lowo.

³³ Kakapa msabibu yawo na makuyu hawo, kafunja mashidi ha mṟasenyi yawo.

³⁴ Nalehamba, nzihe tsikacha, na nzihe tsilewa iitala;

³⁵ Tsikalya maṟa hose ha orukenyi lowo tsikalya kilimu kya ya teri yawo.

³⁶ Kakapa wafee wawee kulya orukenyi. Wawee wa pfinya tsawo.

³⁷ Kawasama wai na fesa na sahabu, ipfo mbaṟi yawo kulakaepfo msa alekapa mtulia.

³⁸ Misiri ikachihio kiheri walekure, kyamba kui kipfa kyawo wuowu wulewachea.

³⁹ Kaala ipuchi liwe kyeshikia, na modo fuwae sa kio.

⁴⁰ Lyilya wawekundi kaende mkate; kawaihutsa kelya kya ruwehu.

⁴¹ Kapfunuo iṟaṟa, kukaletseka mṟinga, fukaida hahadutsu cha meda.

⁴² Kipfa nalekumbuo kyasa kyake kiele; na Abrahamu, mṟundi oke.

⁴³ Kawuta wandu wake kui ngululu, na wasambuṟe wake kui shiimbo sha sia.

⁴⁴ Kawainenga njoruka tsa wa mkambo, wakaoṟa iṟunda lya wandu;

⁴⁵ Kundu wawade mawawaso hake, na iindia mawawaso hake. Haleluya!