SHIIMBO SHA DAWIDI 102 - Bibilia Kui Mdedie fo Kimochi

Kiterewo kiheri kya wukiwa

(Kiterewo kya mndu akeri kiidi kya kiwi na mndu sa adambikia Mndumii-Ruwa manunuwo hake)

¹ Hoi Mndumii, keadanyiawo itarewa lyako, kieṟeṟo kyako kikukoye.

² Kulanjiṟikye kyamu kyapfo mfiri fo wukiwa woko, nonjidehie kudu kopfo, mkonu njilaha unjiṟohuo owinyi.

³ Kipfa mfiri yako iida cha mtsu, na mafuo hako hakasenekia cha shimunyi.

⁴ Ngoo yako ikakapo cha maṟa ikauma, ee da, njihadima ilya kelya kyako.

⁵ Kipfa kya ṟu lya isungulula lyako; mafuo hako hawadanyi na nyama tsako.

⁶ Ngawa cha ilehe kya nuka, ngafanana na ikudukudu lya mba njisame.

⁷ Ngalaa dembo, ngawase cha kinapuru; kii kimonyi huye mba.

⁸ Wakituwa wako wainjiisalucha mfiri puti; walya wanjisuo cha ili wawodo nyi waṟumu; wailya nyamu wechinjisenda inyi.

⁹ Kyamba njilelya mafu cha kelya, na ilongalonga kenyoo kyako na mchenyeṟe.

¹⁰ Kipfa kya tuke yapfo na nyashi yapfo; kyamba kulenjiira na injikumba kuleshe.

¹¹ Mfiri yako nyii cha kiṟinje kya kyukanyi, na inyi njikyeri inaa cha maṟa.

¹² Kya indi, iyo Mndumii, nochidamia noikolonyie mlungana, na ngumbuo yapfo marika na marika.

¹³ Iyo kumonyi nochihoṟoka, na isaṟia Sioni, Kipfa nkyo kiheri kyeisaṟia; ee da, kiheri kileteṟio kileafukia.

¹⁴ Kipfa waṟundi wapfo wameidikiana na mahio hake, na iichio wukiwa kilulyi kyake.

¹⁵ Nyi lyondi wa mkambo wechuowuo rina lya Mndumii, na wamangi wose wa wuyana kiṟumi kyapfo.

¹⁶ Ilyi Mndumii echikoya amemaa iwika Sioni, ilyi echikuloṟa kiidi kya kiṟumi kyake,

¹⁷ Ilyi echiembeṟukia kiterewo kya ai mkiwa, nalaisaluche shieṟeṟo shawo.

¹⁸ Oshari lochicha nyi lochiṟeheṟio isho, na wandu wechiwumbo wechiṟumisha Mndumii.

¹⁹ Kyamba naleambuya ai huye haele hake, kuwuka ruwehu Mndumii naleambuya wuyana.

²⁰ Kundu naicho isungulula lya icho ampfunge, na ipfunguo waleteṟio ipfa.

²¹ Wandu waonguo rina lya Mndumii ipfo Sioni, na kiṟumi kyake ipfo Yerusalemu.

²² Kiheri wandu wechikusanza handu hamu, na wamangi kundu waṟundie Mndumii.

²³ Naleanguṟa pfinya tsako njienyi; kafuiṟa mfiri yako.

²⁴ Njechihamba, hoi Ruwa oko, kulanjiwute makidi hawi ha mfiri yako; maka yapfo nyi wokia marika tane marika.

²⁵ Ilyi mbooko kulewika otende lo oruka, na ruwehu nyi iṟunda lya mawoko hapfo.

²⁶ Ishi shechinyamaṟika, indi iyo nochikaa mlungana; ee da, ishi shechikuo cha nguo; cha maṟao nochishiilacha, nasho shechiilachika.

²⁷ Kya indi iyo nyi ulya ulya; na maka yapfo yechitsitsapfo.

²⁸ Wana wa waṟundi wapfo wechikaa, na oshari lowo wechiwanzo oshangunyi lopfo.