SHIIMBO SHA DAWIDI 10 - Bibilia Kui Mdedie fo Kimochi

Kiterewo huye ya wutahachi

¹ Hoi Mndumii, nkili ohoṟoka haleshe? Nkili oowa kiheri kya ngataṟa?

² Kui orikiki lo mndu mtahachi, mndu mfafa nyi awonyio Wadeho ipfo mshihodinyi yawo.

³ Mndu mnyamaṟi nyi akuṟumisha ipfo langonyi tsake, Mndu muumu nyi alehanyi na Ruwa na impiṟa.

⁴ Kyamu kya mndu o orikiki Kahamba, kuwode kiṟaachepfo Mahiyo hake hose kahamba, “Kuwode Ruwapfo.”

⁵ Njia tsake nyi tsinjihoṟotsu orio kiheri, Mdumbuye yapfo ikeri huye mnu nalawone, Wakituwa wake wose nyi awapirisikya.

⁶ Kahamba mrimenyi foke, njewutohopfo, Kiidi kya moo foko njechiwona wukiwa pfo.

⁷ Dumbu lyake liichuo oseso Na mtambo na mbaka shi ya olimi loke kuichuo wunyamaṟi na wuwicho,

⁸ Nekekaa kundu ko maowionyi, Handu ha kiseekenyi kawaha alai na mti, Meso hake hekeṟinjawia mndu mfafa.

⁹ Nyekewedia kiseekenyi cha miiso opangenyi, Kui mtambo nawade mndu mfafa. Ee-da, nyekewada mndu mfafa. Kamkuruo na ndusu tsake njioke maṟaushi.

¹⁰ Nyi ekekuchunguṟia na iarama Wandu wafari wekeoloka kui pfinya tsake.

¹¹ Kahamba mrimenyi foke Ruwa nyi anjihadimie, Nyaṟika kyamu kyake, awonyi manyalepfo.

¹² Mndumii, kure, Hoi Ruwa, iria owoko lopfo, Ulahadime wafafa.

¹³ Nki kitewe mtahachi namine Ruwa, Kyechihamba mrimenyi foke, ochitaa kiṟachepfo?

¹⁴ Kulewona, kipfa nokeambuya mawicho na uneesi Uwade mawokonyi hapfo. Mndu mfari ulelekia mrima fokepfo. Nyi ui mtarami o wangoeda.

¹⁵ Funja owoko lo mndu o mbaka, Mndu mbicho natao kiṟaache kya mbaka yake, kundu kulaiwone se.

¹⁶ Mndumii nyi mangi ya mlungana; Wandu wa mkambo warahanyikie isangenyi lyake.

¹⁷ Mndumii, nyi uichuo lango tsa wafafa, Nochisungusia mrima yawo, nochideha kudu kopfo.

¹⁸ Kundu nodumbuo kya ngoeda na ulya mbonyie, Mndu o wandu ai teri nalaengeṟe ilya mbaka.