MFANANO 1 - Bibilia Kui Mdedie fo Kimochi

Kiira kya Mfanano

¹ Mfanano ya Solomonyi, mana o Dawidi, mangi ya Israeli.

² Imanya wulaanyi na wuindi, imanya madedo ha chile;

³ ilosho mawuto mecha, kiidi kya wulohi, mwanduye na wutirisi.

⁴ Iinenga masembo wuṟango wucha, na wanake wulaanyi na ikuṟisa;

⁵ menyi wuṟango naadanyie na iengeṟyo kisomyo, na ulya aichi nashikie mbonyi njicha tsirie njia.

⁶ Imanya mfanano na oṟa Ayo na madedo ha wulaanyi na madedo halamanyikie na pata.

⁷ Iowuo Ruwa nyi mawookyonyi ha wuṟango Indi wandu watondo wekemina wulaanyi na wuindi.

Opfundo lo wanake

⁸ Manoko, adanyia kiloshyo kya ndeo, Manya kulade mapfundo ha mayo,

⁹ Kipfa isho shechiwa kitambaa kya osaṟio mdohu kopfo, Na rachi nzingonyi kopfo.

¹⁰ Manoko, wanyamaṟi wakakutuusa, lyo kulaidikie.

¹¹ Wakahamba, ncho luhendesane, Luwaowie kundu lupusuo samu, Lulaaye alai na mti, kulawode kitewe;

¹² Luwameṟe wai na moo cha shi, Wai wecha, cha iwo waisokya ṟungunyi.

¹³ Lochiwada masaa hose ha wuhuru, Lochiichuṟa mba tsadu wai wawade wapfungo.

¹⁴ Iyo nyi ochiwa kyando kyadu; Lochiwada shindo shose shadu.

¹⁵ Manoko, ulahende kimu nawo njienyi Lema kudende kopfo kulaide handu waida.

¹⁶ Kipfa madende hawo hawikya mteeṟa wudekonyi Hadichia ihenda ipusuo samu.

¹⁷ Kipfa mdeho fodeha mṟembu mesonyi ha ndehe yose.

¹⁸ Na iwo wekelaaya samu yawo wawenyi, Wekeowelya moo yawo wawenyi.

¹⁹ Nyi wudo tsikeri njia tsa orio umu awode lango tsa masaa, Wekesoka wandu wawode masaa moo.

Wulaanyi wolaha

²⁰ Wuṟango woirya ṟu ling'anyi kiidi kya njia ing'anyi, Ṟu liichio patenyi;

²¹ Nekefihiṟa kiidi kya chila tsing'anyi tsa wandu, Handu hai na kichumi, Kiidi kya mṟi nyechideda mbonyi tsake

²² Nyo matondo, mṟasa indi mochikunda wutondo? Na walya wemina mukunde imina lyanu, Na masembo isuo wuṟango?

²³ Halukenyi kipfa kya wuwawaso woko; ambuya njechimuletsia mumuyo foko; Na imumanyishya madedo hako.

²⁴ Kipfa ngalaha, nanyo mukaleha; Ngahoṟwo owoko loko, kulakae msa aluambuya;

²⁵ Indi mulehenda kihadi na mbonyi tsako, Manya mulekunda mapfundo hako-pfo;

²⁶ Inyi da njechiseka kiheri kya mkuinadiye fonu, Njechitaluo ilindi wuowu wochimuchea;

²⁷ Wuowu wonu wukamuchea cha otanu lo kiwiriwiri Na mkuinadye fonu fochimuchea cha owira Wukiwa na waale ilyi shechimuchea.

²⁸ Nlyondo wechinjilaha, indi njechiidikya pfo; Wechinjishiha mnu, wechinjiwona pfo

²⁹ Kipfa walesuo wuṟango, Walesambuṟa iindiya Mndumii-pfo

³⁰ Waleidikya mapfundo hako pfo, Wakamina shiloshyo shako shose.

³¹ Wechilya ndunda tsa ohendo lowo, Wechiihuda chila tsawo wawenyi.

³² Kipfa iwuya numa lyawo matondo kochiwawaaha, Na iṟimiṟa lya masembo kochiwarumatsa.

³³ Indi orio monjiadanyia nechikaa olelenyi Nao nechisia moo elechiowuo mawicho.