MAWOOKIONYI 5 - Bibilia Kui Mdedie fo Kimochi

Oshari lo Adamu

¹ Iki nkyo kitapu kya oshari lo Adamu. Mkonu fulya Ruwa alewumba mndu, nalemmbika kui ofano lo Ruwa.

² Nalewumba mndu msoṟo na mndu mka, kawawikya mboṟa kawadumbuya rina nyi Wandu , mkonu fulya alewawumba.

³ Adamu kawada maaka ihana na makumi haṟaṟu, (130) kafee mana o ofano loke, kui mfananyie foke, kamdumbuya rina lyake nyi Seti.

⁴ Adamu amefee Seti maaka yake ikawa mahana nyanya, kafee wana wa kiumi na wa kika.

⁵ Maaka yose ya Adamu alekaa iya wuyana nyi maaka mahana kenda na makumi haṟaṟu, (930) nao kapfa.

⁶ Seti kawada maaka ihana na itanu, kafee Enoshi.

⁷ Seti amfee Enoshi kawada maaka mahana nyanya na mfungade, kafee wana wa kiumi na wa kika.

⁸ Maaka yose ya Seti nyi maaka mahana kenda na ikumi na iwi, kapfa.

⁹ Enoshi kawada maka makumi kenda kafee Kenani.

¹⁰ Enoshi amfee Kenani kawada maaka mahana nyanya na ikumi na itanu, kafee wana wa kiumi na wa kika.

¹¹ Maaka yose ya Enoshi nyi maaka mahana kenda na itanu, kapfa.

¹² Kenani kawada maaka makumi mfungade, kafee Mahalaleli.

¹³ Kenani amfee Mahalaleli kawada maaka mahana nyanya na makumi haana, kafee wana, wa kiumi na wa kika.

¹⁴ Maaka yose ya Kenani nyi maaka mahana kenda na ikumi, kapfa.

¹⁵ Mahalaleli kawada maaka makumi haṟandaṟu na itanu kafee Yaredi.

¹⁶ Mahalaleli kekifee Yaredi kakaa maaka mahana nyanya na makumi haṟaṟu, kafee wana wa kiumi na wa kika.

¹⁷ Maaka yose ya Mahalaleli nyi maaka mahana nyanya na makumi kenda na itanu, kapfa.

¹⁸ Yaredi kawada maaka ihana na makumi haṟandaṟu na iwi, kafee Enoki.

¹⁹ Yaredi kekifee Enoki kawada maaka mahana nyanya, kafee wana wa kiumi na wa kika.

²⁰ Maaka yose ya Yaredi nyi maaka mahana kenda na makumi haṟandaṟu na iwi, kapfa.

²¹ Enoki kawada maaka makumi haṟandaṟu na itanu, kafee Metusela.

²² Enoki kahendelia Ruwa amfee Metusela maaka mahana haṟaṟu kafee wana wa kiumi, na wa kika.

²³ Maaka yose ya Enoki nyi maaka mahana haṟaṟu na makumi haṟandaṟu, na itanu. (365)

²⁴ Enoki kahendelia Ruwa kiheri kyake kyose, nalawonose, kyamba nyi Ruwa alemduo.

²⁵ Metusela kawada maaka ihana na makumi nyanya na mfungade, (187) kafee Lameki.

²⁶ Metusela amfee Lameki kawada maaka mahana mfungade na makumi nyanya na iwi, (782), kafee wana wa kiumi, na wa kika.

²⁷ Maaka yose ya Matusela nyi maaka mahana kenda na makumi haṟandaṟu na kenda; (969) kapfa.

²⁸ Lameki kawada maaka ihana na makumi nyanya na iwi, (182) kafee mana.

²⁹ Kamdumbuya rina nyi Noe, kahamba, “Ichu nyio echiluwihiṟia moo kya iṟunda lyadu na wukiwa wo mawoko hadu iya orukenyi luusese nyi Ruwa.”

³⁰ Lameki kakaa maaka mahana hatanu na makumi kenda na itanu, (595) amefee Noe, kafee wana wa kisoṟo na wa kika.

³¹ Maaka yose ya Lameki nyi maaka mahana mfundade na makumi mfundade na mfungade, (777) kapfa.

³² Noe nyi alewada maaka mahana hatanu, kafee Semu, Hamu na Yafeti.