MARIKO 2 - Bibilia Kui Mdedie fo Kimochi

¹ Mfiri njiangu yamesia, Yesu kawuya-se na Kapernaumu, wandu wakaicho ke ipfo mba ai.

² Wandu wafoi mnu wakakuumbia-pfo kulakeri-se handu ma oo mongo Yesu kawaongoya mbonyi tsake,

³ wakacha wechimendye mndu a muumu shiwungo ariyo nyi wandu waana.

⁴ Walaidime imshitsa o handu Yesu ai kipfa kya mamingi fulya fo wandu. Wakahenda yatuoatuo mba iya alya huye ipfo sumhana na handu Yesu ai. Wakasanja-ho wakasotsya-pfo kitaṟa kilya, kirie mndu ulya a muumu shiwungo.

⁵ Yesu kekiwona kidikyo kyawo, kawia mndu ulya a muumu shiwungo, “Manoko, omehoṟio njonyamaṟo tsapfo.”

⁶ Kyasia kuwekeriho walosha wa wuwawaso maata wadamye-ho wechihiahia ipfo mrimenyi yawo,

⁷ “Nyi ki ili ichu akaria ideda ado? Nyi aruma Ruwa. Kuipfo mndu echiidima iwuta njonyamaṟo pfo shila na Ruwa amonyi.”

⁸ Nalyo Yesu kamanya makusaṟo hawo kawawia, Nki ili mukeri ihia mudo ipfo mrimenyiyi yanu?

⁹ Iki kii kyangu nyi kihya, ngesa nyi iwia mndu-chu muumu shiwungo. Njonyamaṟo tsapfo tsamewuto ang'u nyi imbia, “Kure noire kitaṟa kyapfo nokuhendye?

¹⁰ Kya indi njikundi mumanye, ke Mana o Mndu nyi awode pfinya kunu orukenyi yehoṟia wandu njonyamaṟo.” Kawia mndu ulya amuumu shiwungo.

¹¹ “Ngakuwia, kyekure noire kitaṟa kyapfo nokuhendye kanyi kopfo.”

¹² Oweṟe kakure kaira kitaṟa kyake kawuka-pfo, wandu wawonyi wose. Wandu wose wakauma mkahai wakang'anyisha Ruwa wechihamba ke, “Lulembone shindo cha ishi manyale-pfo!”

Lewi alaho

¹³ Yesu kahendase kulya mawambao ha nduwa. Mamingi fulya fose fo wandu fukacha na hando ai nao kawalosha.

¹⁴ Kechiida-ho, kawona Lewi mana o Alifayo adamye alya kisanyonyi kya okamba. Yesu kambia, “Kenjo nooshane na inyi.” Lewi kakure kahenda ioshana nao.

¹⁵ Lya ifurumia Yesu adamye kilionyi kya shelya ipfo mba ko Lewi, na Wasanyi wa okamba wafoi wawedamye na Yesu na wanyamaṟi handu hamu nao na wa kiloshyonyi kyake. Kipfa kuweipfo wafoi waweoshana nao.

¹⁶ Na wudo na walosha maata wa Mawawaso wawei Wafarisayo, wekiwona ke Yesu nyi ailya hamu na wasanyi wa okamba na wandu wanyamaṟi, wakawia wa kiloshyonyi kyake, “Nki ili ailya na inyo handu hamu na wasanyi wa okamba na wandu wanyamaṟye?”

¹⁷ Na Yesu kekiwaicho ado kawawia, “Iwo wawode oru chiwo wasaṟye mhangapfo, shila na iwo waluo. Wandu njicheye iwalaha chi iwo wasumuhanyipfo, shila na wandu wanyamaṟye.”

Mbonyi tsa ikuotoya

¹⁸ Kiheri kimu wa kiloshionyi kya Yohane na wa kiloshionyi kya Wafarisayo wawekyekuotoya. Wandu wakacha iwesa Yesu, “Nyikili wa kiloshyonyi kya Yohane wechekekwotoya na wa kiloshyonyi kya Wafarisayo, kya indi wa kiloshyonyi kyapfo welekyekuotoya?”

¹⁹ Yesu kawawia, “A wandu wa walinyi weidima ikwotoya mandi-ho menyi wali akeri nawo ngesa? Kiheri-ki kyose wakeri na menyi wali, weidima ikwotoyapfo.

²⁰ Na kukae kushike kiheri iliindi menyi wali echiwuto kowo, ili wekoyo kiheṟi-kyo nlyondi wechikwotoya.”

²¹ “Kuwode mndu echipfumya nguwo njiku kidami kya nguwo njihyapfo; na koka awuta ado, kilya kihya kyewuka o nguwonyi njiku, na handu halya harandukye hakaengeṟa ing'ana.

²² Ma kuwode mndu echiwika mpfinyo fo kipfuo selelenyi njikupfo, kipfa kawuta ado mpfinyo fochiduitsa selela tso, mpfinyo fo na selela-tso shenyamaṟika Mpfinyo fo kipfuo fokewiko selelenyi njihya.”

Mbonyi tsa Sabato

²³ Naho Yesu kechiida ipfo mademenyi ha Ngano mkonu fo sabato, na wa kiloshyonyi kyake wakawoka itufuo mahaa halya ha Ngano.

²⁴ Wafarisayo wakambia, “Ambuya nykili wawuta kindo kilakiwikye momu mkonu fo sabato?”

²⁵ Nao Yesu kawawia, “Ngesa mlalemesome kilya Dawidi alewuta lyandi walewuṟa kelya wakawado njaa na walya wawekeri nao?

²⁶ Chando aleida na Mmba ya Ruwa, kiheri kilya Abiatari akeri mkohanyi mnene, kalya mkate iya yeṟihichya oo oshangunyi lo Ruwa, kyayo kulakeri mndu a mbikye momu fo ilya, shila na wakohanyi tupu. Dawidi aleilya kaenengya na walya wawei nao?”

²⁷ Nao Yesu kawawia, “Mkonu fo Sabato fu mbike kipfa kya kiira kya mndu, ma chi mndu kipfa kya mkonu fo sabatopfo.

²⁸ Ikyo kikaenenga. Mana o Mndu kawa na Mnene o Sabato.”