MAITALA 36 - Bibilia Kui Mdedie fo Kimochi

Kioṟa kya waka wawaalike

¹ Wasongoru wa mbaṟi ya kishari kya Gileadi, mana o Makiri, mana o Manase, mana o Yosefu, wakahenda ideda na Mose, na wasongoru wengi wa shishari sha Waisraeli.

² Wakahamba, “Mndumii odu, Mndumii-Ruwa naleluwawasa ihawia wandu wa Waisraeli oruka kui iwika kuṟu kuhya, luwe kioṟa kyawo; kawewawasa-se iinenga wana wa kika wa manomayadu Selofehadi kioṟa kya ndeawo.

³ Kyaindi wo wakaaliko nyi wasoṟo wa shishari shingi, kioṟa kyo kyawo kechiuka kodu kiwe kya wanduwo wa shishari sho wawaalika; ko ikyo kioṟa kyadu kechitutia.

⁴ Mkonu mnene fo ngumbuo ya kioṟa kyawo fochiitalio handu hamu na fulya fo mkambo fo iwo wawaalika na ko kudi kishari kyadu kechiwonase kioṟakyopfo.”

⁵ Nahong'u, Mose kainenga Waisraeli iwawasolyi liwukie ko Mndumii-Ruwa, kawawia “Wandu wa mba ya kishari kya Yosefu wahamba kya lohi.

⁶ Nyi wudo Mndumii-Ruwa aletutuma kya wana wa kika wa Selofehadi; wawode momu foaliko nyi mndu cho oose wamemkunda, kyaindi waaliko ipfo mkambonyi fowo,

⁷ Kundu kioṟa kya Waisraeli kilasamiṟio ko mkambo fungi; orio Mwisraeli naringe necha kioṟa kya mkambo foke.

⁸ Mndumka oose awode kioṟa kisharinyi kimuho kya Waisraeli nkimbaṟi naaliko nyi mndu o kisharinyi kimuho kya Waisraeli, kundu orio Mwisraeli naduo kioṟa kya sahuye.

⁹ Kudo kochikaa kioṟakyo kyose kechisamiṟo kuwuka mkambonyi fo Waisraeli kihende ko mkambo fungipfo. Orio kishari kya Waisraeli kechiwada kioṟa kyake.”

¹⁰ Wana wa kika wa Selofehadi walewuta chandu Mndumii-Ruwa alewawasa Mose.

¹¹ Wose: “Mala, Tirsa, Holga, Milka na Noa wakaaliko nyi wana wa mayawo.

¹² Walealiko ko mba tsa kishari kya Manase mana o Yosefu, na kioṟa kyawo kikadeo ko kishari kya wandeawo.”

¹³ Iha nyiho mawawaso na wuikimbi sa Mndumii-Ruwa aleinenga Waisraeli kui dumbu lya Mose kulya rendewelenyi lya Moabu, mataya ya Meda fo Yordani kufui na mṟi fo Yeriko.