MAITALA 19 - Bibilia Kui Mdedie fo Kimochi

Mafu ha mbe ya kimande

¹ Mndumii-Ruwa kaengeṟa iwia Mose na Aroni.

² “Iwu nyiwo wuikimbi wo mawawaso hako Inyi Mndumii-Ruwa njiinenga Waisraeli. “Wia Waisraeli wamuendie mmbe ya taho ya kimaande ilawode paṟi manya tewe yose, sa ilalemepfungio kumbi lyedema.

³ Nanyo muiinengie mkohanyi Eliezeri mmbeyo Yechiitso na nja ya mfiṟiha ishinjo oshangunyi lo mkohanyicho.

⁴ “Numa mkohanyi Eliezeri naire samu ntutu naiole na kimnyo ka mfungade iambuyana na ora lo mbele lo ihema lyesanzia.

⁵ Mmbeyo yose yechikoṟo na modo isenekie oshangunyi lo mkohanyi. Orio kindo kyayo: samu njonyi, nyama na mṟa shechimayo modonyi.

⁶ Numa mkohanyi naire kidi kya meresi, ande na sufu ya kimaande nashiwike kulya modonyi.

⁷ Numa ya isho, mkohanyi nechisanja nguo tsake na isamba kose na mṟinga, naho naide na mfiṟihenyi; nechiterefuka mṟasa kyukanyi.

⁸ Mnducho echikoṟa mmbeyo nao daa nechisanja nguo tsake na mṟinga na isamba kose na mṟinga, nao daa nechiterefuka mṟasa kyukanyi.

⁹ Mndu mheṟemtsu nechiira mafu ha mmbeyo nahaduo handu hecha nja ya mfiṟiha. Hechisuṟumo necha heṟundia Waisraeli wose isungusia mṟinga foheṟemtsa, mṟumo fosanja njonyamaṟo.

¹⁰ Mnducho echiira mafu ha mmbeyo kimbaṟi nasanje nguo tsake, kyaindi nechiteṟefuka mṟasa kyukanyi. Wuikimbiwu nyi wo mlungana, nyiwo Waisraeli na wandu wengi wekekaa kiidi kyawo.”

Iwawaso lya iheṟemtso

¹¹ “Mndu kapaaya mnying'a fo mndu oose nechiterefuka mfiri mfungade.

¹² Mfiri fo kaṟaṟu na fo mfungade mnducho nechisamba na mṟinga fulya foheṟemtsa, nao nechiheṟemka. Kyaindi kada alakuheṟemtsa mfiri fo kaṟaṟu na fo mfungade nechikaa aterefukie.

¹³ Mndu mopaaya mnying'a fo mndu apfiie kada alakuheṟemtsa naterefutsa ihema lya Mndumii-Ruwa, nechiletsano na wana wa Waisraeli. Mnducho nechikaa aterefukie kipfa kya ili alaleolio mṟingafo foheṟemtsa.

¹⁴ “Ili nyi iwawaso kokoya mndu apfiia ihemenyi: Orio mndu echiida na ipfo ihemenyi ang'u msa ai ipfo ihemenyi, nechiterefuka mfiri mfungade.

¹⁵ Orio kihia kilawode kipfinko kii pangala kechiterefuka.

¹⁶ Mndu oose kapaaya mnying'a fo mndu awooho ang'u apfa opfu lungi nja ya mba, ang'u kapaaya fuo lya mndu ang'u ṟungu lyeṟika mndu nechiteṟefuka mfiri mfungade.

¹⁷ Kipfa kya walya walekuterefutsa wechiira mafu ha mwano fohoṟia wunyamaṟi fulya fulekoṟo modonyi, mafuho haruwo na mṟinga fo medenyi kinungunyi.

¹⁸ Mndu sa amheṟemtsu, naire iande, numa naliwike ipfo mṟingenyi, kiidima naolie ihema na shihia shose shii ipfo ihemenyi na wandu wakeripfo. Naweoliase mndu alepaaya mafuo ha mndu, ang'u mbihu fo mndu alewooho ang'u alepfa opfu lungi, ang'u alepaaya kipfu.

¹⁹ Mkonu fo kaṟaṟu na fo mfungade, mndu sa amheṟemtsu nechiolia mndu aterefukie mṟingafo; nyi wudo echiheṟemtsa mnducho aterefukie mfirifo fo mfungade, nao nechisanja nguo tsake nawesamba kose, na kyukanyi nechiheṟemka.

²⁰ “Kyaindi mndu aterefukie kada alakuheṟemtsa, mnducho nechiwuto kambenyi lya wandu nawiko kuleshe, kipfa kya ili aterefutsa ihema lya Mndumii-Ruwa. Kyamba alaleolio mṟinga foheṟemtsa, naterefukie.

²¹ Wandu wechiindia iwawasolyi kiheri kyose. Mndu echiolio mṟinga foheṟemtsa nechisanja nguo tsake; na icho echiwada mṟingafo futerefukie nechiterefuka mṟasa kyukanyi.

²² Orio kindo kyose mndu aterefukie echikiwada kechiterefuka, na mndu oose echikipaaya kindokyo nechiterefuka mṟasa kyukanyi.”