MAITALA 17 - Bibilia Kui Mdedie fo Kimochi

Ndichi ya Aroni

¹ Kiidima Mndumii-Ruwa kawia Mose,

² “Wia Waisraeli wakuendie ndichi ikumi na tsiwi, orio msongoru o kishari na ndichi imu. Ṟehia rina lya orio umu owo ndichinyi yake,

³ na rina lya Aroni noliṟehie ndichinyi iendo nyi o kishari kya Lewi. Kochiwa na ndichi ko orio msongoru o kishari.

⁴ Duo ndichitso ihemenyi lyesanzia, na itsiwika sumhana na isanduku lya mkundana, handu inyi njekekoyana na iyo.

⁵ Ndichi ya mndu sa njechimsambuṟa yechioṟa. Nyi wudo njechidumbuo tapa teṟe mwichiwie fo Waisraeli fomununuwia.”

⁶ Mose kadeda na wandu wa Israeli. Wasongoru wawo wose wakamnengia orio umu na ndichi yake chandu kiitumanyi na kishari kyake tsose tsikawa ndichi ikumi na tsiwi. Ndichi ya Aroni ilewiko handu hamu na ndichitso.

⁷ Mose kaleṟia ndichitso tsose oshangunyi lo Mndumii-Ruwa ihemenyi lyesanzia.

⁸ Ili lya ngama ngamenyi, Mose nalehenda ihemenyi lyesanzia. Nalekooyapfo ndichi ya Aroni o kishari kya Lewi, yameoṟa na ikumbia shimanja shamewaṟa shiwaṟo shakumbia ndunda njiwiri tsa mlozi.

⁹ Numa Mose kaira ndichi tsilya tsose oshangunyi lo Mndumii-Ruwa, kaloṟa Waisraeli wose, na orio msongoru kairaho ndichiyo yake.

¹⁰ Mndumii-Ruwa kawia Mose, “Wihiṟia ndichiyo ya Aroni sumhana na isanduku lya mkundana. Yechiiṟichioho, na wuikimbi ko wanduwo wekenunuwa ke kokoya walada inunuwa lyawo, wechipfa.”

¹¹ Mose katana ado chandu aletutumo nyi Mndumii-Ruwa.

¹² Waisraeli wakawia Mose, “Ambuya wulalu! Luarisika! Losia! So lose losia.

¹³ Orio mndu echitikiria ihema lya Mndumii-Ruwa nechipfa. Ngesa, lochiarisika lose?”