MAITALA 15 - Bibilia Kui Mdedie fo Kimochi

Mawawaso hewika shidaso

¹ Mndumii-Ruwa kawia Mose,

² “Wia Waisraeli ke ili mochishika ipfo orukenyi njechimuinenga handu mochikukaya,

³ mkanjiinenga mwano inyi Mndumii-Ruwa fuwuka mfiṟihenyi yanu ya shuma, kidaso kekoṟa ang'u mwano, kundu mndu naawutsie kyasa kyake aleteṟia, ang'u ilekia mwano fo nnga ang'u mwano fo kiheri kya mfiri mnene yanu injiteṟie, na isungusia opfaamo lucha lunjichihiṟie inyi Mndumii-Ruwa,

⁴ kyasia, ichu molekia mwanofo foke, nechiendiese Mndumii-Ruwa mwano fo mso fo kilo kimu kya mso mmamiri fumruwike fukalongolongo na mafuda lita imu;

⁵ handu hamu na mvinyo fo mwano fo mvinyo lita imu shindosho shechiduana na orio kyuma ichondi ang'u mburu kii nyi kidaso kekoṟa.

⁶ Kiheri kelekia mwano fo isuwa, shilo shiwi sha mso mmamiri fumruwe lita imu na kienga kya mafuda shechilekio cha mwano fo mso,

⁷ handu hamu na mwano fo mvinyo, mvinyo lita imu na kienga, isungusia opfaamo lucha mwano fuchihiṟie Mndumii-Ruwa.

⁸ Kiheri mochiinenga Mndumii-Ruwa pung'a ya kidaso kemaya modonyi ang'u mwano foawutsia kiasa ang'u mwano fo ofoṟo,

⁹ mndu nechiilekia cha mwano handu hamu na mwano fo mso fo shilo shiṟaṟu sa mcha na shiheo shiwi sha mafuda,

¹⁰ handu hamu mwano fo mvinyo, lita tsiwi tsa mvinyo, na isungusia mpfaamo mcha mwano fuchihiṟie Mndumii-Ruwa.

¹¹ “Isho nyisho shindo shechilekio handu hamu na orio ipung'a, isuwa ang'u mburu.

¹² Iitala lya shindosho lyechiengeṟeka chandu iitala lya shuma shechilekio.

¹³ Orio Mwisraeli nechiosha wuhendeliwu kiheri aiwika kidaso mpfaamo fuchihiṟie Mndumii-Ruwa.

¹⁴ Kokoya kuwode mhenu ai kiidi kyanu msa aiida ang'u nyi o kiheri kyose, kakunda ilekia mwano foke kui ifukoṟa, mpfaamo fuchihiṟie Mndumii-Ruwa, mnducho nechiwuta chandu nanyo mokewuta.

¹⁵ Ipfo shisharinyi shanu shose shechicha, wuhendeliwu muiwuta nyi wudo mhenu oose echiwuta ichu ai kiidi kyanu; oshangunyi lo Mndumii-Ruwa mochiwa wamu;

¹⁶ nyo nao mochichilio nyi iwawaso lilya lilya na wuikimbi iwo iwo.”

¹⁷ Mndumii-Ruwa kawia Mose,

¹⁸ “Ongoya Waisraeli ke kiheri wechiida na ipfo orukenyi kundu njikeriwaduo

¹⁹ orio mandi mochilya shilimu sha orukalo mochileṟia kyanya kiheo kiliwe munjiinenge inyi Mndumii-Ruwa.

²⁰ Mukamekoṟa mkate, mkate fo kuwoka fo shilimu sha kuwoka sha mso fonu fochilekio cha mwano fowuka kyuuhenyi kehuuya mboma ang'u mbeke.

²¹ Mochinjiinenga inyi Mndumii-Ruwa mwanofu mtoṟu ipfo shisharinyi shanu shose shechiituma.

²² “Kyaindi kokoya moda mulaosha mawawasoha njimuinenga Inyi Mndumii-Ruwa kui owoko lo Mose;

²³ kokoya mfiri yechicha wandu wada walaosha ishi shose Inyi Mndumii-Ruwa njiletutuma Mose,

²⁴ kyasia, kokoya dekolyo lyawuto mulakusirie, mamiingi fose walaichi, mamiingi fose wechilekia ihache lya ipung'a limu li ndawanana liwe kidaso kekoṟa, mpfaamo mcha fuchihiṟie Mndumii-Ruwa handu hamu na mwano fo mso na fo mvinyo chandu mawawaso hahambie. Na wudo na wandu wechilekia kioṟo kimu kiwe mwano fowuto wunyamaṟi.

²⁵ Mkohanyi newika kisanza kipfa kya mamiingi fose fo Waisraeli, nawo wechihooṟio cha kipfa dekolyo wawelikusiriepfo, na wameende mwano fowo, kidaso kemaya modonyi ko Mndumii-Ruwa cha kidaso na mwano fowuto wunyamaṟi kipfa kya deko lyawo.

²⁶ Mamiingi fose fo Waisraeli, hamu na wahenu wekekaa kiidi kyawo, wechihoṟio kipfa wawei kiidi kya idekolyo.

²⁷ “Mndu umu kawuta wunyamaṟi alakusirie, nechilekia suwana ya mburu ya maka fumu iwe mwano fowuto wunyamaṟi.

²⁸ Mkohanyi nechiwika kisanza oshangunyi lo Mndumii-Ruwa, kipfa kya mnducho aledeko alakusirie nao nechihoṟio.

²⁹ Mochiosha wuhendeli wumu ko orio mndu echideko alakusirie, nawe nyi Mwisraeli ang'u nyi mhenu ekekaa hamu nanyo.

³⁰ “Kyaindi mndu oose echiwuta deko akusirie, nawe nyi menyi kanyi ang'u mhenu, nechiwa naruma Mndumii-Ruwa, na kimbaṟi nawoho.

³¹ Kyamba nalekana na shilya Mndumii-Ruwa ahambie, katehia iwawaso limu kiidi kya mawawaso hake. Mnducho nechiwahio kuleshe nakamu; na nechiwuwuyo opfu loke o amonyi.”

Itehia lya Sabato

³² Mfiri fumu, kiheri Waisraeli wawei kulya nuka, walewona mndu umu kesana ngu mkonu fo sabato.

³³ Kyasia, mnducho kadao oshangunyi lo Mose Aroni na mamiingi fose.

³⁴ Wakamkumba kipfungonyi kipfa kulawemehambo na pata chandu wandu wa mbaṟi ii wechiwiko.

³⁵ Nahong'u Mndumii-Ruwa kawia Mose, “Mnducho kimbaṟi nawoho; chila yose wechimkumbia maho nja ya mfiṟiha.”

³⁶ Kyasia, wandu wakamduo nja ya mfiṟiha, wakamkapa na maho tane apfa, chandu Mndumii-Ruwa alewawasa Mose.

Iwika nguo mambo

³⁷ Numa Mndumii-Ruwa kawia Mose,

³⁸ “Wia wana wa Waisraeli, nowawawase wasungusie mambo wawike marikanonyi hawo, wawike ndusu tsa buluu huya orio mambo. Wawie wawe mowuta wado kiidi kya shishari shawo shose shechiituma.

³⁹ Mambotso shechiwa ngumbuo konu. Orio mandi mochishiwona, mochikumbuo mawawaso hako hose na ihaawutsia, kundu mlaoshe lango tsanu na isho mochishiambuya na meso hanu.

⁴⁰ Mambotso tsechimukumbuṟa mawawaso hako hose, na mochihaosha necha, nanyo mochiwa waele wako.

⁴¹ Inyi nyio Mndumii-Ruwa, Ruwa onu njilemuwuta orukenyi lo Misri. Kundu njiwe Ruwa onu. Inyi nyio Mndumii-Ruwa, Ruwa onu.”