IWUKA 19 - Bibilia Kui Mdedie fo Kimochi

Waisraeli waafukia fumvuhu lya Sinai

¹ Meri fo kaṟaṟu Waisraeli wamewuka orukenyi lo Misri, mkonu na fulya fulya wakashika nuka ya msanga ya Sinai.

² Nawo wekikure Refidimu na ishika nuka ya msanga ya Sinai, wakakaa kulya nuka; Waisraeli wakawikapfo kambi iambuyana na fumvuhu.

³ Mose kado na fumvuhu ko Mndumii-Ruwa. Na Mndumii-Ruwa kalaha Mose ai kulya fumvuhu, kechihamba, “Nochiwia wa mba ya Yakobo, na iwawasia wana wa Waisraeli, madedoha;

⁴ Mlewona chandu njilewutia Wamisri, na chandu njilemuira nyo huya makungo ha mbeṟo, ngamuende nyo na koko.

⁵ Kyasiang'u wulalu kokoya mochiindia ṟu lyako kya lohi lohi, na iwada mkundano foko, nyihondo mochiwa wecha koko kota mbaṟi tsose tsa wandu; kyamba wuyana wose da nyi masaa hako,

⁶ nanyo mochiwa koko wumangi wo wakohanyi, na mkambo mwele. Iho nyiho madedo ochiwia wana wa Waisraeli.”

⁷ Mose kahenda ilaha wameku wa wandu, kawadambuya madedoho hose, Mndumii-Ruwa awembawasie.

⁸ Wandu wose wakaidikia handu hamu wakahamba, “Isho shose Mndumii-Ruwa alehamba lochishiwuta.” Na Mose kawia Mndumii-Ruwa, madedoho ha wandu.

⁹ Mndumii-Ruwa kawia Mose, “Ambuya, Inyi njiicha na kopfo kiidi kya ipuchi lyiwanzi kundu wanduwa waicho kiheri njechideda na iyo, kundu nawo wawuteho ikuidikia iyo tane mlungana.” Mose kawia Mndumii-Ruwa, madedoho ha wandu.

¹⁰ Mndumii-Ruwa kawia Mose, “Kehenda ko wanduwa, nowaheṟemtse inu na ngama; wasanje na maṟao hawo,

¹¹ wakuṟeheṟe kya ili lya kilalau, kyamba mkonufo kaṟaṟu Mndumii-Ruwa nechisoka fumvunyi lya Sinai mesonyi ha wanduwa wose.

¹² Na iyo nochiwawikia oṟiho wanduwo njoora tsose, kochiwawia, ‘Kuṟisenyi, muladoe fumvu lyi, manya mulalyiwade, manya oṟiho lolyo; orio mndu echipaya fumvulyi, na kikaki na nawoho.’

¹³ Owoko lo mndu cho oose lulapaaye mnducho, indi kya lohi yake nechikapo na maho, ang'u nakapo pfumu; ko koya nyi mndu ang'u kokoya nyi shuma, echikaa na moopfo. Ilyi iranda lyechikapo kitsitsi nlyondi wechisembelia fumvunyi.”

¹⁴ Mose kasoka awuka fumvuhu kahendia wandu kawaheṟemtsa; nawo wakasanja nguo tsawo.

¹⁵ Kawia wandu, “Mukae mukuṟeheṟie mkonu fo kaṟaṟu, mulasembelie mndu mka.”

¹⁶ Nahong'u mkonu fo kaṟaṟu, kiheri kya ngamenyi kukakaapfo ikuṟuṟuma na mbawa, na ipuchi lyinene huya fumvu, na ṟu lya ombe lyilededa mnu. Wandu wose wawei handu halya wakadedema.

¹⁷ Mose kawutaho wanduwo alya handu wawei, kawaende kundu wawonane na Mndumii-Ruwa; wakahoṟoka ora lo seri lo kifumvu kilya.

¹⁸ Fumvu lyose lya Sinai daa lyikaduka mtsu, cha kipfa Mndumii-Ruwa nalesoka kui modo; na mtsu fulya foke fukado huye cha mtsu fo nungunyi ya modo, fumvu lyose lyikadedema mnu.

¹⁹ Naho ṟu lya iranda lyekiengeṟa ideda mnu Mose kadeda, nao Ruwa kamwidikia ko ṟu.

²⁰ Mndumii-Ruwa, kasokia fumvu lilya, alya kitongolo kya fumvu; Mndumii-Ruwa kalaha Mose nahende tane alya kikoyo kya fumvu; Mose kado na huye.

²¹ Nlyondi Mndumii-Ruwa alewia Mose, “Soka na seri noikimbe wandu walashike ipahuo njia wache, iambuya Mndumii-Ruwa, numa wapfe; kiidi kyawo waarisike.”

²² Wakohanyi nawo daa, wakatikiria Mndumii-Ruwa, kundu wakuheṟemtse, Mndumii-Ruwa nalashike iwapufukia.

²³ Mose kawia Mndumii-Ruwa, “Wanduwa wechiidima itikiria fumvuli lya Sinaipfo; cha kipfa iyo kuleluikimba, kochihamba, wikenyi mṟasa mbai na mbai ya fumvu, na iliṟingichia.”

²⁴ Mndumii-Ruwa kambia, “Henda, nosoke iyo; na iyo nochido, iyo, na Aroni handu hamu na iyo; kyaindi wakohanyi walya na wandu walapengeluo ichea Mndumii-Ruwa, kundu nalache iwapufukia huyawo.”

²⁵ Nahong'u Mose kasokia wanduwo na iwawia mbonyitso tsose alewawasio.