2MBONYI TSA MAHERI 3 - Bibilia Kui Mdedie fo Kimochi

Solomoni asungusia Hekalu

¹ Kyasia Solomoni kawoka iwika hekalu lya Mndumii-Ruwa kulya Yerusalemu fumvuhu lya Moria, handu Mndumii-Ruwa alechea ndeye o Mangi Dawidi, handu Dawidi aweteseheṟie, hehuya Ngano kyahunyi kya Ornani Myebusi.

² Solomoni nalewoka isungusia hekalu lyo mkonu fo kawi fo meri fo kawi, fo maka fo kana fo wumangi woke.

³ Wuleshe wo hekalu lyo nyi mita (27) na wulandari wolyo nyi mita (9).

⁴ Wulandari wo kiṟiha kya osehu kya hekalulyo nyi mita (9), na wuleshe wokyo ko ido huye nyi mita (9). Njomombo tsa kiṟiha kyo tsiwenjishikie sahabu njicha ko kyamba.

⁵ Njomombo tsa kiṟiha kilya king'anyi kya hekalu tsiwenjikapie mbao tsa miboreshi, na ishikio nyi sahabu njicha. Kiṟiha kyo kiwekichope nyi sanamu tsa mashidi ha mitende, na picha yatso ikawa cha minyoṟoṟo.

⁶ Solomoni nalechopa hekalu lilya na maho ha wuhuru wung'anyi, na sahabu njicha iwukie Parvaimu.

⁷ Nalechopa hekalu lilya lyose lya Mndumii-Ruwa ko sahabu njicha: maboriti ha ikai yalyo, mlango yalyo, fremu tsa mlango yalyo, na njomombo tsalyo tsose. Solomoni kawia waṟundi wake wasungusie sanamu tsa makerubi watsiwike njomombonyi tsalyo.

⁸ Wuleshe wo handu halya haele mnu wuwei mita (9), na wulandari woho wuwei mita (9), na njomombo tsaho tsiwetsishikie nyi ngoseṟa ya tani (20) tsa sahabu njicha.

⁹ Mdo ya msumari yaho iwenjishikie nyi wulemeri wo gramu (570) tsa sahabu. Njomombo tsa shiṟiha shitutu sha huye shewika masaa tsiwenjishikie nyi sahabu.

¹⁰ Solomoni nalesungusia sanamu tsiwi tsa makerubi, katsishikia na sahabu, katsiwika handu halya haele.

¹¹ Orio ikerubi liwewode makungo hawi ha wuleshe wusanze wo mita (4:5), mita (2:25) ko orio ikungo. Ikungo limu lilekupaya na omombo limu lo oralu lumu lo kiṟiha kilya, na ikungo lingi likawadana na ikungo lya ikerubi lingi.

¹² Na ikungo limu lya ikerubi lyo lya kawi lya wuleshe wo mita (2:25), likawadana na ora lu, lumu lo omombo lo handu halya haele.

¹³ Makungo ha makerubi ho hawewadanyi cha mnyoṟoṟo ko wuleshe wo mita 9 wo kiṟiha kilya hechiambuyana na mongo fokyo.

¹⁴ Solomoni kawesungusia isulia lya kitani kicha lya fana ya buluu, kikisanze nyi fana ya king'aring'ari, na fana ya kimande na fana ya maruwa. Katsishela ko picha tsa makerubi.

Ngo tsiwi tsa aṟeṟa

¹⁵ Kyasia Solomoni kasungusia ngo tsiwi tsa aṟeṟa tsa wuleshe wodo huye wo mita (16), na kirau huyatso kya mita 2, katsiilika kichuminyi kya hekalu lilya.

¹⁶ Kasungusia oṟo tsa mbaṟi ya mshe, katsiwika huya ngo tsilya. Katsana shisanamu (100) sha mbaṟi ya mkongomanga, kahekia huye ya mkufu iya.

¹⁷ Solomoni kawika ngo imu oralu lo nuka lo kichumi kya hekalu; kailaha nyi Yakini . Na ngo iya yakawi naleiwika oralu lo mtsudu lo kichumi kilya, kailaha nyi Boazi.