1WAMANGI 17 - Bibilia Kui Mdedie fo Kimochi

Wuumu wo Oruka: Mbonyi ya Ruwa ya awutsio

¹ Kyasia Elia o kihongo kya Tishbe ipfo Gileadi, kawia Mangi Ahabu, “Kwi rina lya Mndumii-Ruwa, Ruwa o Israeli ai na moo ichu njekemṟundia, ngakulyia nyamu ke kochiwada ṟauṟa ma mvuo-pfo na kui idedo lyako.”

² Kiidima idedo lya Mndumii lyikachea Elia.

³ “Kure uhende kya oṟa lo ngamenyi, kuwode opanga kufui na kimeda kya Kerithi kii ora lo ngamenyi lo Yordani nyipfo ochiowa.

⁴ Na ipfo nochinyo mṟinga fo kimeda-kyo; ngoseṟa ngameṟeheṟa makuru hakuendie kando.”

⁵ Kyasia, Elia kaindia iwawaso lya Mndumii, kipfa nalehenda kakaa kufui na kimeda kyo kya Kerithi, maambatsana na Yordani.

⁶ Makuru hakamwendie mkate na nyama ngamenyi, na mkate na nyama kiukanyi kanyo mṟinga fo kimeda kilya.

⁷ Komeida mfiri mata, kimeda kilya kikaumia, kipfa kulalekapa mvuo.

Elia na mka mkusu o Sarepta

⁸ Idedo lya Mndumii likamchea, lyehamba,

⁹ “Kure uhende Sarepta, fui mṟi fo Wasidoni nokae pfo. Ambuya ngameṟeheṟa mka mkusu o ipfo nakuambuye.”

¹⁰ Kyasia, kakure, kahenda Sarepta, kekiafukia kichumi kya mṟi, ate kuwode mndu mka mkusu asana ngu; kamlaha, kambia, “Kenjiendie mṟinga njinyo.”

¹¹ Kiheri awehenda iende, kamlaha kambia, “Kenjiendie na kipeṟengu kya mkate owokonyi lopfo.”

¹² Mka ulya mkusu kamhaluo, “So Ruwa ai na moo, njiwode mkate pfo, shile nnde imu ya mso fui kinungunyi na mafuda maangu hai chupenyi na inyi njikeri isana shingu shiwi kundu njisungusie kelya kyako na manachu oko, lulye luwedie opfu.”

¹³ Elia kambia, “Ma kulaowuo, henda uwute chandu ohamba; kyaindi sungusia mkate unjiendie kuwoka; kiidima usungusie kyapfo na mana chu opfo.

¹⁴ Kipfa Mndumii-Ruwa o Isreli nahamba adi, kipipa kyo kiwode mso fochikaa fusiepfo, ma mafuda hai ipfo chupenyi hechisiapfo mṟasa na kushike mkonu fulya Ruwa echiende mvuo orukenyi.”

¹⁵ Kyasia, kahenda, kawuta chandu Elia alewehamba, nao amonyi, na Elia, na mba yake wakalya mfiri sa ifoi.

¹⁶ Kipfa kinungu kilya kya mso kilesiapfo, ma chupa ya mafuda iletenekia pfo, kirianyi na idedo lya Mndumii kui dumbu lya Elia.

Elia aṟutsa mana o mkusu

¹⁷ Kikashika, numa ya isho, mana o mka ulya, menyi mṟi kaluo ndaṟe yake ikang'ana katana alekia moo.

¹⁸ Mka ulya kawia Elia, “Nyi kiki kyako na iyo, iyo mndu o Ruwa? Ngesa nyi ulenjichea ikumbuṟa Ruwa wunyamaṟi woko, nowahe mana oko?”

¹⁹ Kambia, “Njinengia mana opfo.” Kamwambia kamduo kiṟihenyi kya kai kundu awekekaa amonyi, kamlaṟa kitaṟenyi kyake.

²⁰ Katerewa Mndumii, kadeda, “Hoi Mndumii, Ruwa oko, nki ili owuta kindo kiwicho kudi, itane owaha manachu o mka chu, sa akeri, injiwutia mecha?”

²¹ Kakuhoṟuo kaṟaṟu huye ya manachu mpfu, katerewa Mndumii kahamba, “Hoi Mndumii, Ruwa oko, ngakuterewa, moo fo mana-chu fukewuya-se hoi.”

²² Mndumii kaicho kiterewo kya Elia, na moo fo mana fukawuya, kaṟuka.

²³ Kyasia Elia, kaduo mana ulya ko mae kahamba, “Ambuya mana opfo nyi ai na moo?”

²⁴ Mka ulya kawia Elia, “Wulalu ngamanya na pata ke iyo nyi mndu o Ruwa, na ngoseṟa idedo lya Mndumii dumbunyi lyapfo nyi lohi.”