1PETRO 1 - Bibilia Kui Mdedie fo Kimochi

¹ Inyi Petro njii msu o Yesu Kristo ngamwiṟikiṟa nyo wasambuṟe wa Ruwa wande mulee mataṟataṟa ipfo Ponto na Galatia na Kapadokia na Asia na Bitinia muipfo mui cha wahenu.

² Kui kyama kya Ruwa Wande kiwesongoe kilemnenga kamusambuṟa moilisho nyi Mumuyo Mwele kyemwidikishya Yesu Kristo na imwolya samu yake. Wutonga na ofoṟo shimuwelukie welu.

Iwedia liwanzi

³ Kuichiko Ruwa ichu ai Nde o Mndumii odu Yesu Kristo! Ili amelusaṟya osaṟio lung'anyi kalufee feo lya kawi luwedye owedi luende moo kui iṟuka lya Yesu Kristo lya ipfo ko wafu.

⁴ Koikyo kuiiwedia iwona mboṟa tsilya Ruwa ateseheṟie wandu wake ipfo Ruwehu tsilesia tsilai na mbaka tsilechiuma tsinjikoome ipfo ruwehu.

⁵ Mui-waringe muwodo nyi pfinya ya Ruwa kui wuidiki, muhendewonyo okiio luiluteseheṟe iwoneka kiheri kyefurumya.

⁶ Chihionyi kya ikyo mochikapa ngululu, ma ili muiliso wukiwa kui shiheshyo shiwe na shiwe kipfa kimuwaṟi kiheri ki kyangu.

⁷ Kitewe nyi kundu kihesha mwidikye fonu kiende kiṟumi kicha kota kilya kyehesha sahabu iya yechisia nayo yekyemanyisho modonyi, kishikye iwono kyechiende kiichiko na wuitoṟi na kiṟumi mandi halya Yesu Kristo echiwonekya.

⁸ Nao nyio mumkundi mulalemembone, mumwidikye mulambonyi, nyi mochikapa ngululu muwodo nyi sia ilechiwa ihambo ii-njilishe idi.

⁹ Kipfa mochikudaya kilya wuidiki wonu wuṟungye na ipfo nyilo okiio lo mrima yo yanu.

¹⁰ Okiio na ilu waikimbi wawe ipfulapfula na ihana-hana kyalo wechideda kui Mumuyo wehongia wutonga wu mleinengo nyo.

¹¹ Nyi waweihana-hana ke kiheri nyi iki na lya iindi Mumuyo ichu o Kristo awei nawo alimanyishye-ho ilindi awesonguo iṟingishya mawawyo halya hehoya Kristo na mawusuṟi kiṟumi kilya kechiitumana naho.

¹² Wakashika iwonesyo ke shindo shi weshikuwinya wo wa wenyipfo indi kitewe n nyo. Nashonyisho muleshiongoyo wulalu nyi walya walemwendie nyo Ndumi ya Sia ya okiio kui Mumuyo Mwele aa-mdume awuka ruwehu, sho sheamtsya na wasu wa ruwehu macha hemehya-ho.

Ndaho yechumia mchumie mcha

¹³ Nkyo kitewe mukae na mhie yanu msanze cha wandu wakufungye kitsinyi na ilaa dembo. Mukuotoye mochikuwedya na macha wutonga wu mochiendyo ilindi Yesu Kristo echowenekya.

¹⁴ Mui wana wa Ruwa wawode wuindi, mlakioshe-se manyale lango njiwicho tsilya muwewode kacha lilya muwei watondo.

¹⁵ Kya indi chando ichu alemlaha ai mwele na wudo nanyo muwe waele kui mhendekie fonu fose.

¹⁶ Kipfa kii-kiṟehie, “Muwe waele kipfa nyio inyi njii mwele.”

¹⁷ Nanyo ili muisenda Ruwa nyio Wande ichu ai modumbuya orio mndu ose mdumbuye isumhanye mawuto hake alechiambuya oshangu; Chumienyi ohendo lonu kiheri ki kitsuha mui wahenu mochiindia Ruwa.

¹⁸ Kyamba muichi mochimanya ke chi kui shindo shesia ma fesa ma sahabu mulemhenda italao nasho mhendekienyi fonu fo shindo sha mai furianyi na shido sha waku walya wanupfo.

¹⁹ Kya indi nyi muiwatalae kui samu iya njiele ya wuhuru ikeri ya ichondi lilafanyi lilai na kitendo, nyio Kristo.

²⁰ Nyio awemsambuṟe nyi Ruwa matika wuyana-wu wulawendewiko, indi nyi alemanyishio iheri li lifurumi lya maheri hose kimaduma kyanu.

²¹ Nyo mui-waenengye nyio mochiidikya Ruwa chu alemṟutsa wapfunyi kamsumba wuitoṟi. Nkyo kyatewa wuidiki wu wonu wurie na owedi lowedya Ruwa.

²² Mukamaa isanjika mrimenyi yanu kui wuhoyi wo ihoya kilya kii lohi kyemwinenga ikundana na wanawawama lilakulembetseṟye muwe mochikundana mnu necha nyo muwenyi na wenyi kui mrima fose.

²³ Kyamba mui-wafee lya kawi feo lilawukie ndeo echikaa napfe kya indi ipfo ko ndeo elechipfa, nyi kui dedo lya Ruwa lii na moo lyechikaa mlungana.

²⁴ Chando kukuṟehye: orio mndu ai cha maṟa. Na orio kiṟumi kyake kyose kikeri cha kiwaṟo kya ngeṟenyi. Maṟa hakameuma na kiwaṟo kikaweoloka.

²⁵ Indi idedo lya Mndumii lyekaa mlungana. Nalyo nyilyo dedo lilemwongoyo konu lyemwendie Ndumi ya Sia.